邊度可以用80幾蚊，就可以食到一餐貴過酒店四舊水嘅Buffet（自助餐）嘅高檔晏晝飯？就係去股東會。
話說，香港小輪（00050）尋日喺The Mira開股東會，有大約廿名小股東抽住一袋二袋咁趕到去，諗住要參加股東會，唔知係唔係班小股東一日走幾場太忙無為意，原來明文規定12點15分截龍，唔畀股東入。嗰廿名尊貴股東當然嬲嬲豬，山長水遠嚟到，幾大都唔走，一於喺門口等。
原來堅持真係美德。雖然會場內已經爆滿，但公關見守喺門口嗰班都係支持咗公司好多年嘅股東，一場嚟到無得食中餐，於是請佢哋落去The Mira酒店餐廳食Buffet補數，呵番！
絲絲上網Check過，樓下食Buffet，每位要成差唔多四舊水，公司認真唔話得。點知仲未夠，聽公關講，原來準時到場股東食嗰餐中餐，仲貴過樓下Buffet！
依家香港小輪一手大概八千幾蚊，若有小股東咁神心將實物股份「拆」細到10股（大概80幾蚊）轉名畀Friend，咁就即係個Friend揸住10股喺手去股東會，就可以80幾蚊食到餐貴過酒店Buffet！有冇人咁神心呢可？
余絲韻