絲絲講場：金嗓子江老娘70歲自認17

自隊新產品 杯杯清

話說，金嗓子尋日同傳媒飯敍，江老娘繼續好似平日咁豪邁，每隔十幾分鐘，就叫大家「乾一杯」！唔係飲酒，而係佢哋公司啱啱今個月新出嘅草本飲品，佢哋即場開咗幾罐請大家試飲。江老娘唔單止叫大家乾杯，絲絲見住江老娘自己真係每次都一飲而盡，幾咁豪氣。

不過呢隻草本飲品香港未有得賣住，副總經理何錦強話，希望下半年可以喺香港推出，依家仲搞緊申請手續。咁內地今個月開賣之後銷情點樣呢？江佩珍話好理想，不過就未有統計數字，佢仲想出年出口埋去東南亞國家添。

講吓講吓，在場有人提起阿江董事長今年幾多歲，點知佢一聽到，即刻好溫柔咁話自己得17歲o架咋。就係咁，江老娘嗰份17歲卜卜脆嘅嬌俏與精靈即刻唧咗出嚟！咁都畀絲絲見到！絲絲唔覺意o架咋。

余絲韻