投資U WIN：「兼」字有出頭 畢業唔使愁
不少應屆畢業生近月可能已開始為搵工做準備，但以下三位商科大學生就定過抬油，皆因他們未畢業已月入萬萬聲，認真令人羨慕。事實上，他們在學時分別擔任兼職理財策劃師及保險從業員，其中兩位已入行近兩年，現平均每月賺1萬至2萬元，當中的大學生Addison稱：「最勁試過月賺四萬元。」堪稱U界掘金王。
Stephen 理財策劃師：推動置業 整頓生活
樹仁經濟及金融系三年級生劉景泰（Stephen）自大學一年級起當理財策劃師。他對工作充滿熱誠，「我好鍾意研究紅酒同做義工。為咗呢份工，我成日同同事做義工；做內地生意，我亦識到啲紅酒Club！之後仲有機會去意大利酒莊添。」
Stephen享受工作，兼職的額外工作量不但未令他倍感吃力，反而成為他改善生活的動力。「我每個星期返三日工，兩日學！其餘時間陪女友、做義工等。」他學會有效管理時間，不但改掉沉迷打機壞習慣，且會為組織家庭和買樓的目標而奮鬥。他稱：「有時要作取捨，為工作同讀書而放棄玩樂！」
月見15客 簽到五單
作為理財策劃師，就要針對各個顧客群需要，提供滿意的理財服務。Stephen較愛服務年長客戶，「老一輩思維都開放，肯花時間聽你講嘢，又肯畀意見。我再用書本學到嘅理論去解說我嘅觀點，會畀到佢哋一個專業形象。」他每月平均會見15個客人，做到生意的機率達三至四成，即每月大概簽五張單。
正所謂No Pain No Gain，要成功Sell客一點也不簡單。Stephen憶述，「試過最勁簽咗張二百萬元嘅單，足足見咗個客五、六次。每次見呢個客，都覺得好大壓力。」他銷售的產品多樣化，包括保險、基金、股票及債券等，他指事前準備工夫一定要做足。
他另稱，家人朋輩曾質疑他入行的決心，他指會盡力做好，同時也會設一個時限給自己，若過了時限仍未達標，會選擇離職。
Addison 理財策劃師：決心全職 北望神州
同樣兼職理財策劃師的城大管理科學系三年級生羅俊軒（Addison）自大一起入行，「我頭半年，淨係諗住學嘢，好似海綿咁吸收養分，第一單Deal都係做咗兩個幾月後先簽到。」他續稱，「一年Sales，十年人！份工可以畀我接觸到唔同嘅人同老闆。」
「讀大學，最緊要係開拓眼界，擴闊人脈，同埋搵做生意嘅機會。」他自嘲自己剛進大學時像個「少爺仔」，總自視過高，竟認為三年內置業是輕而易舉的事，直至做兼職賺錢，才明白賺錢毫不容易。
他續說，「做兼職有樣好，就係早啲入行，早啲知道呢行啱唔啱自己，清楚自己想要咩，唔想畢業後先嚟入錯行。」的確，提早入行了解行業前景及經濟現狀，對事業發展有幫助。他決心畢業後當全職理財策劃員，「我睇好呢行，可以北望神州，且對香港一直提供嘅理財產品有信心。」
惟Addison不諱言，理財策劃員入行門檻低，故行內人提供的服務質素有參差，「初入行，我曾問自己，我係咪適合做呢行？啱唔啱我性格？人哋買咗份保單，保唔到，點算？」他強調，會盡量做好自己本分，照顧好自己每個客戶。
搞埋時裝 分身不下
他坦言，該兼職工作量也繁重，「做Broker要比較唔同公司代理嘅產品，要好勤力。」他指自己身兼不同角色，包括學生、上司、下屬及男友，故須學會分配時間，「考試時期，要將讀書放第一位，工作就唔應該咁進取。」
儘管如此，同學在求學時期做兼職還是量力而為，Addison憶述，「一直想搞時裝生意，起初好大想頭，希望喺畢業前，單生意同理財策劃事業都會上軌道，所以急住喺上年年頭開舖，點知分身不下，今年年頭執咗佢，蝕咗十幾萬元。」
Sammi 保險從業員：放手一博 尋找方向
樹仁工商管理二年級生陳澤琛（Sammi）剛簽約成為保險從業員。她入行也算偶然，坦言對保險業運作不熟悉，入行全因朋友介紹。她亦對將來事業發展未有明確方向，故即管一試。
無底薪搵客 新挑戰
「我怕悶，唔鍾意坐Office，鍾意見人，所以之前做嘅兼職都係銷售員、補習老師等。」她每逢周末及周日會上班做銷售員，平日會抽一晚時間當補習老師，每月收入約三千元，用作生活費。
「我入U後，再無問屋企人攞錢，住宿費都係自己畀。」不過，她不會因做兼職而走堂，故惟有趁周末賺錢。
她又道出兼職銷售員及保險從業員的分別，「做Sales每日見好多人，老中青、名星、有錢人等，每日都要Meet Target；做保險就要同每個客建立關係，得到佢哋信任。我剛簽咗份受聘合約，無寫明要Meet Target，亦無底薪。對我嚟講係新挑戰！」惟她稱，「做保險啲時間有彈性啲。若仲搵到穩定收入，會放棄做銷售員。」