孖妹S檔案：學有錢人投資理財

趙：瑞士盈豐銀行（EFG）亞太區行政總裁 趙善銓

吼優質股債避風頭

Kitty：孖妹都好想快啲進身為私人銀行大戶，究竟要有幾多錢先可以升級？

趙：一般私人銀行客嘅資產要求至少100萬美元（約780萬港元），我哋嘅客一般至少有500萬美元（約3,900萬港元）資產。

放眼國際 分散風險
彩兒：睇怕我哋有排未有機會做你嘅大客！今年我喺股場真係輸得幾慘烈，經歷完人民幣貶值、油價大跌，依家又要擔心中國經濟會陷入L形發展，唔知一班富豪又覺唔覺得好難玩呢？

趙：今年市場波幅大咗，投資環境的確難咗，油價依家算穩定咗落嚟，市場應該可以慢慢消化美國加息，但中國經濟放緩不利環球市場，香港尤其受呢個因素影響。中國經濟需要有結構性轉型，但未見好有成效。

瑞士盈豐趙善銓表示，富豪的投資變得更國際化。

摩根大通李思穎表示，有客戶認為駕馭財富有許多學問。

Kitty：咁講法，港股市場今年咪應該無咩運行囉？

趙：我諗短期港股都好難去返上年大時代嗰時咁，資金都會比較謹慎同保守啲，但又唔會死，恒指唔會話回落到15,000點嘅。

彩兒：面對咁嘅投資環境，一班富豪又有咩對策？

趙：佢哋普遍保守咗，降低咗槓桿比例，依家大部分人都係「好息之徒」，偏好有固定收益嘅投資，好似高質素嘅債券同派息較好嘅股票，因為過往幾年投資增長股都錄得唔少虧損。美國通脹預期升溫，加上人民幣有機會貶值，亦令佢哋過去大半年對黃金嘅興趣大咗。

另外，佢哋嘅投資變得更國際化，以前集中睇亞太區嘅市場，但內地增長放慢咗，兩、三年前淨係投資人民幣已可收到高息兼有升值，依家已經少咗呢瓣做，惟有將個投資組合國際化啲，盡量分散風險。

上一、兩年就多睇歐洲股票，希望有機會受惠歐央行嘅量寬措施，歐洲經濟可以隨美國復甦；今年就睇番多啲日本市場，因為日圓有機會已經見頂回落，利好股市，日本公司未來派息或有所增加。

Kitty：依家個市唔上唔落，你哋嘅生意又會唔會因為咁而難做咗？

近年聚焦中國富豪

趙：都會，市場冇咩明顯走勢，私人銀行嘅客戶都保守咗，多買債券收息，變相少咗交易，對於我哋嚟講咪少咗商機囉。○八、○九年後，政府對銀行嘅監管嚴格咗，令利潤有所下降。

事實上，近年好多大型銀行都賣咗自己嘅私人銀行業務。不過，亞太區嘅私人銀行係有優勢，因為近年內地嘅財富創造速度好快，富豪數目多咗好多，佢哋好希望出去國際市場做投資，需要有人幫佢哋做環球嘅資產配置。

李：摩根大通私人銀行董事總經理兼財富諮詢部北亞區主管 李思穎

多元部署 助減虧蝕

彩兒：俗語有云「富不過三代」，若我想嫁個有錢人，唔通要避開富豪家族第三代打後嘅人？

家族辦公室用途廣

李：之前我哋做過一個大型調查，由一九八二年福布斯富豪榜內頭100大家族，到咗二○○二年仲有幾多個可以維持到個排名，結果發現每10個富豪家族，最後淨得約1.5個，故某程度上「富不過三代」呢個講法都幾真。

當中好多原因造成咁嘅情形，包括家族企業受政府政策改變所影響、匯率問題，亦唔排除經濟或政治上嘅風險。另外，我哋發現過分集中都係一個蠶食財富嘅主要因素，比如，家族企業單做一個行業、地區，或者持有單一嘅資產類別；其他原因就有家族成員糾紛，被迫分家。投資過分集中嘅風險相對較易處理，可透過分散地區、資產類別、投資年期，將風險平均咗佢。

彩兒：聽講近年啲富豪家庭好興成立「家族辦公室」，究竟有咩用（口架）？

李：近呢3至5年，新興市場，尤其是中國嘅富豪人數顯著增長，令成立家族辦公室成為熱話。呢個概念源自歐美，通常開始成立目的係管理財富。

比如，有啲家族會想有人協助佢哋達到某啲投資目標，或者做一啲直接投資，需要做盡職調查，其後發展到照顧家族成員嘅需要，無論由家族出門訂酒店機票、小朋友交學費呢啲事情都管理到，好似一個私人秘書。

家族辦公室少則得一個人都可以，早期通常有3至5人不等，若家族成員多，或兼顧全球性投資，有啲甚至會有40至50人。

彩兒：可協助理財之餘，又提供到各種生活服務，我都想有個家族辦公室呀。

Kitty：呢啲家族辦公室資產規模一般由4,200萬至15億美元不等，平均5.16億美元，睇你都冇啦。

彩兒：今日冇，可能將來會有呢……有個家族辦公室可令家族嘅投資風險比較易控制，但又係咪可避免家族成員間嘅錢銀糾紛先？

李：家庭管理係藝術多於科學，本質係幾代人點樣可和睦相處，呢個學問唔係富有家族獨有問題，若家族成員眾多，大家自然有唔同想法。富有家庭複雜啲，係因資產較龐大，或運作緊一間企業。

資產壯大 注意紀律

我認為唔係一開始訂立咗個宗旨就可解決呢啲糾紛，背後需要各家族成員投入同配合，同埋溝通，否則宗旨到最後只不過好似張明畫，掛咗喺家族辦公室。

好多創富嘅第一代慣咗一人做決定，係好有效率，落到第二、三代，唔同人就有唔同考慮，所以家庭內要有個做決定嘅機制，如設投票方式。

Kitty：市場咁多不穩定性，啲富豪又點避開金融危機呢？

李：從事金融行業嘅人都冇水晶球可預計到金融危機，依家市場周期比過往快咗好多，要避免大幅虧損嘅方向，通常都係分散投資同講求紀律，而控制槓桿都幾重要。

當資產去到某個規模，投資紀律尤其重要，正因每個人都有情緒，若有機制去做投資決定，排除個人情緒，係會比較好。

終身學習 把握機會

Kitty：一眾富豪到底有咩致富秘訣呢？

李：我相信每個人喺人生當中都有成功機會，好多時係睇你有冇把握機會，呢個關乎做事夠唔夠決斷同膽識，風險承受程度有幾多。我見我好多客戶都好有求知欲，同埋肯接受新事物。

彩兒：要創業成功致富睇怕要付出好多努力，有個富爸爸好似好啲。

李：我大部分客人都唔肯定財富對下一代係咪一個負擔，因呢件事情帶來好多責任。曾經有個客人同我講，財富本身有自己生命，係需要去駕馭佢，當中有好多學問，要識好多嘢，唔係一個簡單嘅禮物。

若有料報畀彩兒同Kitty或有嘢問，可電郵money.biz@on.cc

Kitty 彩兒