Market Insight：電力股負面因素多

受美國聯儲局加息預期升溫所影響，上周港股風向一轉，周三、四的跌市，把周初升幅化為烏有。

六月加息？古勝就估聯儲局試水溫可能性居多，唔好講第一季美企業績麻麻，四月的非農職位增長，大失所望得16萬個，是去年十月以來最少，六月十五日聯儲局開會，同月二十三日英國脫歐公投，萬一爆冷脫歐，成個歐洲經濟肯定有一輪震盪，橫睇豎睇，都應該睇埋呢枚歐洲計時炸彈會唔會誤爆先作決定。

強行加息弄巧成拙

況且，美國利率期貨預示六月加息機會得28%，除非五、六月就業市場數據好到離晒譜，市場大幅修正對息口向上的預期，否則在華爾街缺乏「共識」下夾硬嚟，在總統大選年搞個股災出嚟，邊個擔當得起？

近期樓市弱勢成為大眾焦點，市建局首個資助房屋煥然壹居，由申請者放棄揀樓，落疊買家撻訂鬆人，到上周五賣唔晒，都成焦點新聞。其實港人真係唔好笑A股大媽，話人哋一窩蜂，香港樓市本質一模一樣，升時個個爭崩頭，跌時個個縮沙，唔好講話驚自己份工無咗供唔起一批，即使有條件上車，都話要睇定先。

即使香港經濟二十年來最差，香港重量級地產巨擘依然重申買樓量力而為的講法，講明自住樓唔怕買，當然會有人話佢賣花當然讚花香。尤其在下認識不少八、九十後年輕人，都唔明當中重點，唔少都諗住樓市他朝大跌七成，可以撈到平貨。

先不談樓市假使有如此跌幅，他們積累的財富也可能受波及而縮水（例如輸股票），到時經濟與就業環境也可能不容許他們諗買樓（借唔到錢或者自己失業）；再者，在靜待樓價下瀉期間，假如是要到外面租樓的，每年白花相當樓價3至4%的租金，付之東流，即使給你十年後等到樓價跌到高位急瀉四、五成的機會，計落都唔會太着數，仲要每份租約，怕被迫遷或者加租，都咪話唔頭痛。

上車盤不涉及投資

除非還未有自住樓在手的，是準備一步到位，買租金回報1厘多的超級豪宅或者超高溢價新樓，如果是三、四百萬自住上車盤，根本不能純因為睇淡唔入市，反而供應多的情況下，往往有更多質素較佳的選擇。

反而係，如果經已擁有自住物業，仲有閒錢諗買多層，至有條件話樓市前景唔好，或者其他投資更好前景，先真正有選擇話睇淡唔買。

上周五電力股見反彃，華潤電力（00836）有瑞銀唱好，股價升逾5%，華電國際（01071）則升3.2%。連一啲新新能源股亦做好，龍源電力（00916）及華電福新（00816）各升超過1%。

瑞銀發表研究報告，將中資電力股看法由「中性」下調至「負面」，主因係行業面對產能過剩的問題，以及電力改革帶來風險，但就認為潤電的利用率及回報率較高、燃煤比例較低，將其列為行業首選，上調評級至「買入」。

內地四月份全社會用電量同比增加1.9%，不過對比三月份的5.6%，升幅大為收窄。另一方面，火電設備平均利用小時同比減少140小時，較水電的減少99小時多。在製造業、工業放緩下，數據又未見大起色，用電需求仍然疲弱。呢個情況亦反映喺潤電的數據上，首四個月累計售電量同比微升0.6%，但單計四月則跌一成二。

潤電跟炒要識食胡

早前發改委亦發布文件，要地方政府同企業放緩燃煤火電建設步伐，嚴控火電發電規模，加上中央鼓勵使用潔淨能源，以改善空氣污染，未來電價又有下調機會，傳統電力股盈利受壓，行業前景存在唔少隱憂。

走勢上，潤電上周五股價收復10日線，成交亦配合，短期雖有反彈，但升勢難持續，加上近期市況疲弱，跟炒要見好識收，下個阻力位在13.7元。

古勝