北水頭等倉：中金宜候調整加注
作為權威人士評論的後續，國務院網站連發三文談經濟，評及三個問題：「穩在哪、優在哪、改善在哪」，似乎是要積極回應對當前政策成效的質疑。投資者有甚麼想法？也許A股現時成交額（昨日滬深兩市主板成交才3,600億元人民幣），就是最好說明。
花旗的研究報告預計，MSCI將於六月十五日宣布將A股納入其系列指數，並於明年中生效。另亦有外電報道，目前是iShare MSCI新興市場ETF最大機構投資者的Bridgewater，已於上海註冊投資公司，似乎大鱷們都在準備往中國淘金之旅。
業務前景唔悲觀
昨日恒指一度試叩兩萬點關未果，但仍高收164點作結，報19,883點。雖然上大人將訪港，市場已消化可能宣布深港通啟動日期，但昨日升市是炒作官方或會宣布優化滬股通安排，到底真定假，好快有答案。
筆者維持平常心看待深港通開通的消息，但若然有優化滬港通安排，則另作別論。如果想博中資金融股，內銀股唔會諗，券商股雖屬受惠股，但今年上半年業績難睇，買貨唔使太心急。諗來諗去，都係睇番隻中金公司（03908），皆因呢隻股主要係做投行業務，受零售經紀佣金業務萎縮影響較輕，未來國企改革、扶持新興戰略板塊，戰略行業兼併，都涉及股權融資，中金前景並唔悲觀。
另外，值得留意，公司董事、高管上月自發籌資8億元以吸納H股，用實際行動撐H股後市。
中金股價在上月創上市以來新高13.6元後現回吐，至11元水平現支持，昨日收報11.82元，想博中資金融股，呢隻股可以在11元水平睇位加注，目標年內股價再創新高，重要支持9.5至10元區域。
司慕渢