Market Insight：中建築現水平值博

論到好消息，市場又傳深港通最快九月開通，花旗亦幫手搖旗吶喊，講到六月十五號凌晨五點就會公布A股納入MSCI指數，距今一個月唔夠。

然而，昨日帶動大市的並非港交所（00388），而係明日放榜之騰訊（00700）。QQ每季炒業績幾乎冇走雞，就算業績低過預期亦有得炒，「憧憬」兩個字已值回票價；觀乎Google及facebook壟斷全球網上廣告超過一半市場，「贏家通吃」並無吹牛。

數據提振效果短暫

四月內地經濟數據幾乎冇樣好，淨係發電量回復負增長就令人覺得首季係海市蜃樓，而社會消費品零售額僅增長10.1%，再退一步便成單位數字，據統計局解釋係汽車銷售回軟所拖累，其他樣樣都有不錯增長，尤其樓市小陽春帶動家電、家具及裝修得益匪淺。

房地產的確係最佳提神劑，可惜效果短暫，大城市樓價飆升結果出現歷來首次「逆城鎮化」，唔少人見置業夢碎，索性攞筆錢返鄉下夠起多幾層。

聯想集團（00992）跌到5蚊出現終極反彈，百麗（01880）無厘頭連升三日，都屬於爛船有三斤釘的例子。中國建築（03311）兩日跌12.4%之後，昨日亦回升4%；單刁橫睇掂睇都予投資者不良印象，一間做建築及基建的公司無端端向一間做開物業的姐妹公司買物業，市場唔柴台有鬼。

香港寫字樓租金回報率大家心中有數，中建築往績市盈率10倍、周息率3.18%，今年原本預測市盈率7.3倍、周息率4厘，現時變成拖低回報，大行估計攤薄因素約7%。

雖然曲線注資顯得不倫不類，但一個多咗現金，一個多咗舊物業。不過，中國海外（00688）向來是負債比率最低之一家內房股，毋須靠賣物業套現，就算賣亦可直接賣畀母公司；有分析話母公司其實係想變相增持中建築，動機儘管靠估，但中建築每年盈利增長兩成以上，母公司想提高穩定收益來源亦不足為奇，只是方式並不受市場歡迎。

系內料有後續動作

中建築呢三日兩跌一升之後，跌幅恰巧就是攤薄因素之7%，假如日後再無「不務正業」，現價吸納並無蝕底。集團一五年盈利增長20.1%，今年首季亦多賺20.2%，一二至一四年分別多賺41.4%、30.1%及25.7%，其股價一向波動極有限，低位有得買就要趁手，因為基本因素並冇變，淨計手頭合約，未來幾年收益已有保證。

中海系現時一門五傑，除咗中海及中建築之外，其餘「孫輩」亦有中海宏洋（00081）、中海物業（02669）及遠東環球（00830）等，但中海宏洋因樓盤較集中在三四線城市而受高庫存影響，遠東環球一直炒唔郁，剩低「後起之秀」中海物業較有潛力。不過，連中信股份（00267）亦透過注資入股中海，相信系內仍有動作。

昨日鋼鐵板塊大致做好，馬鋼（00323）、鞍鋼（00347）及重鋼（01053）分別升6%、2.8%及3.6%。工信部官員喺中國第九屆國際鋼鐵大會開幕時就提及，要積極化解鋼鐵過剩產能，並加快推進鋼鐵行業轉型升級，發改委早前亦話化解過剩產能工作將會全面進入實施階段。

行業去庫存、去產能的工作持續進行，從數據上睇，鋼鐵行業有回暖迹象。四月份中國鋼鐵行業PMI指數按月升7.6%，為一三年三月以來最高。據中鋼協統計的大中型鋼鐵企業，三月全行業實現盈利27.5億元人仔，係連續十五個月錄得虧損後，首次見盈利，惟鋼鐵業首季累計虧損仍達到151.3億元人仔。

鋼鐵業復甦路漫長

以首季業績嚟講，馬鋼及鞍鋼都錄得虧損。馬鋼首季虧損收窄，同比下降四成，但仍蝕3.5億元人仔。鞍鋼則由盈轉虧，蝕6.2億元人仔，主因鋼材價格與去年同期相比仍有一段差距。

早前鋼鐵價格大幅上升，除季節需求推動之外，黑色商品的炒作令鋼鐵期貨連漲多日，不過炒風隨即被三大期交所出手遏止。事實上，價格仍要睇供求關係，基本因素未改善，鋼鐵價格升勢難持續。另外，價格回升雖有助提升鋼企的盈利，但同時或阻礙去產能的進度，目前行業復甦之路仍漫長。

古勝