絲絲講場：股神臨老變心 傳吼雅虎

呢個男人咁多年，話唔掂科網股就唔掂，何解臨老忽然改變？雅虎舵手邁耶雖則Senior咗做靚媽，但話晒曾經靚絕硅谷兼係科網女神，阿靚媽女神隨時無得撈，啲仲Senior啲嘅Uncles難免「我見尤憐」。上月底股神旗艦巴郡開股東會，首次網上直播就係經雅虎搞。眉來眼去成咁？股神仲唔係……

估計睇中媒體業務

不過，男人無論幾多歲，照計都想揀二字頭囡囡嚟憐愛（唔信？問吓任何一位男士）。所以，絲絲有理由相信股神吼嘅唔似係邁耶。

咁佢睇中咩？話唔定係雅虎嘅媒體業務。咪以為雅虎只得e-mail同互聯網，實情仲有財經、體育同影片網站，今年網上廣告收入就佔咗雅虎首季收益成44%。

曾靠投資ABC大賺

股神無搞開呢瓣？咪傻啦，佢呢方面有40、50年經驗，早在80年代已靠買ABC（美國廣播公司）股份大賺，巴郡依家仲揸住唔少報紙同電視台股份。

股神同科技股絕緣？你以為啦。佢一早就投資IBM！IBM唔會唔係科技股啩。無論佢係雅虎單Deal做咩角色，學巴群股東話齋「佢（巴菲特）實有着數嘅！」

余絲韻