投資U WIN：iBank新人王十樣Dos

人情世故 趁早通曉

1. 衣着要端莊

第一日返工，畀人第一眼的印象非常重要，男生一定要西裝打領呔上陣。Sean指，「人靠衣裝，唔知自己會去咩部門嘅話，着西裝打呔最穩陣，有啲組別或可着得Causal啲，但第一日返工點都要打呔，之後返工就留意同事點樣打扮再配合。」

女生裝扮較為多變，惟他不贊成穿全套套裝，「女仔着套裝感覺太強，可着啲得體嘅連身裙，唔好過分花俏，顏色唔好太鮮艷。」

Kenneth小檔案	Sean表示，男仔第一日上班要打呔。	Sean小檔案

2. 30秒自我介紹

與同事交流最重要是自我介紹，Sean認為，30秒時間就剛好。「除咗講自己名外，可講自己讀邊間學校、學科、實習職位，話畀人知你嚟做啲咩，有咩目標等。」之後嘗試尋找共同話題，最易入手就是學校背景，當發現對方原來是同校師兄師姐，話題自然源源不絕。

3. 背熟同事名

記得所有同事名稱是首要任務。Kenneth指，記人名是一種禮貌，亦有助建立人際網絡。「座位上一般都有Seating Plan，宜盡快記低所有同事的名及座位。」

4. 同秘書Friend

公司秘書可以說是「一人之下，萬人之上」，記得跟她打好關係。Sean稱，「秘書最了解公司事情，因同事成日轉工，但秘書好少轉人。同佢打好關係對工作有好多幫助，如寄信快啲、Claim錢快啲。」

Kenneth指，與秘書熟絡有收穫，「有一次我幫過秘書搞Summer Ball，本來實習生唔會安排出席嗰次活動，但就因我哋幫咗秘書，最後邀請埋實習生參加。」

5. 放工後「Happy」

Kenneth提到，每間公司有其文化，如外資投行同事喜歡放工後去Happy Hour，一般周四、五晚會一起食飯及到蘭桂坊飲酒。作為新人，若不抗拒相關活動便應積極參與。Sean指，「放工唔參加同事聚會，唔會阻礙工作發展，但活動令同事關係更熟絡，係錦上添花。」

6. 開OT睇部門

以為開OT是勤力的表現就大錯特錯，Sean指，不同公司的老闆對下屬開OT有不同看法。「從事Sell Side的公司，晚晚OT好正常；若做Buy Side的公司，同事一般唔會OT，反而你OT，老細會質疑你辦事能力，唔明點解工作效率咁低。」

7. 發問動腦筋

初入職有好多事會不明白，但總不能每事問，且要問得有技巧。Sean指，「投行工作涉及好多數據，有機會要自己搵資料。有時唔知點樣入手，但都要先試吓自己解決。若諗唔到點做，就問同事。」

Kenneth指，不恥下問非常重要，但切忌「問完又問」，因同事認為解答一次，你就應識做，故請教別人時，要問得清楚及深入，避免問完都做錯。

8. 做錯要補飛

投行工作講求準確性，有錯要即認兼糾正。Kenneth指，「做錯事好平常，但知錯就應即通知上司同認錯，講埋補救方法。認錯人人做到，唔好畀咗麻煩同事又唔幫手解決。」

9. 主動忌踩界

Sean稱，投行工作重視團隊合作性，分工仔細，工作時要分清自己角色及責任，「新人要主動學習同幫手，但做嘢唔好過界，如做互聯網板塊研究員，對京東商城（美股︰JD）有興趣，但公司可能擬定京東為消費板塊，咁就唔好亂做。」

10. 認真有分加

Kenneth認為，要在眾多實習生中突出自己，就要有認真的工作態度，工餘時多閱讀與工作有關的新聞和資料，嘗試把遇到的事情聯繫至工作上。「無時無刻去了解呢個行業資訊，上司會覺得你求知欲強，對工作有熱誠，自然對你加分。」