孖妹S檔案：拆解 「個市輸死人」之謎

蘇：招銀國際策略師 蘇沛豐（Daniel）

技術走勢弱要避險

彩兒：一入五月，港股走勢似足玩跳樓機咁刺激，炒股賺得雞碎咁多，都唔夠買驚風散！

蘇：恒指上月底跌穿上升通道，RSI又出現三頂背馳情況，且MACD線仲穿埋信號線；國指比恒指更早一步跌穿上升通道添，五月走勢認真睇淡，恒指後市有機會回補19,400至19,700點嘅裂口。其實近期RSI跌至30左右呈超賣，大市都有出現反彈，所以預計唔會一下子跌落去。

蘇：不過，唔好見到有反彈就即刻咁開心，因有機會會形成頭肩頂形態，依家已見到左肩同個頭，頸線係20,000點，所以記得小心睇路啦……相信短線會彈上去20,800點，接近左肩水平，一旦確認頭肩頂，下一步就會下試18,400點㗎喇，即接近二月低位。

蘇：五、六月加埋嚟睇係五窮六絕，究竟會唔會跌到去18,400點，就要睇英國公投結果，同埋美國喺六月會唔會加息，如果美國加息、英國又脫歐就不得了喇！

招銀蘇沛豐表示，幾個避險指標間接反映港股短線前景欠佳。	致富鄭文光表示，炒細價股的股友今年成績不俗。	陳先生

Ricardo

愛姐

跟股神操作幾Work

Kitty：香港呢邊唔掂，咁內地A股應該都好似拖手仔咁齊齊冇運行？

蘇：A股已率先出現頭肩頂形態，走勢都轉弱，若短期內回升到約2,900點水平以上，就會被視為假跌破，如果唔得嘅話，就即係頭肩頂成立，會跌番落去2,700點，接近今年低位。

彩兒：如果喺避險指數方面，又睇到乜線索？

蘇：我留意到美匯指數由上年二、三月起一直喺橫行區上落，近期落到去93水平嘅橫行區底位就出現反彈，反映資金流番去美元，不利港股，有機會又彈番上去接近100，即避險情緒又再升溫，資金由新興市場流走，主因近期美元跌得急，其他貨幣理應趨強，雖然日圓強勢，但又冇基本因素支持，只得美國有機會加息。

另外，其他避險資產升幅已多，日圓兌美元早前一度急升至約105水平，亦扭轉貶值趨勢，資金流至美元機會較大；黃金亦升穿近3年嘅下降通道，幾個避險指標都間接反映港股短線前景唔掂。

Kitty：要點樣先可以喺Chok市中保命呢？

蘇：最緊要守紀律，尤其係炒三、四線股，喺買入前就要設定止蝕位，設定咗就要執行，仲要記得唔好亂咁溝貨，再者，上落市好難順勢而行，股神巴菲特名言「別人貪婪時我恐懼，別人恐懼時我貪婪」好有用，做相反操作會比較Work。仲有，唔好諗住有開市，就等於你要開工炒先得，市道唔配合，就寧願少做少錯，更加唔好盲目等股份返家鄉啦，呢啲嘢真係冇仇報（口架）。

彩兒：我班閨密話要買防守性強嘅公用股嚟避險喎。

騰訊抗跌 可揸長線

蘇：近排成個板塊都炒貴晒，若只係想揸一、兩個月就冇意思，咁不如揸Cash好過啦！進取嘅股友，不如考慮吓隻一號仔──長和（00001）。

雖然佢旗下3UK同O2 UK（O2）合併告吹，但佢基本因素尚算OK，不妨等大市跌至19,400點先入一注，再等跌穿19,000關後再入一注，不過，佢持有歐洲業務較多，宜於英國公投前先行沽出，避避風頭。

蘇：另一方面，冇咁受經濟周期影響嘅企鵝仔──騰訊（00700）除咗可以等炒首季業績外，亦值得揸長線，雖然佢都係恒指成分股，但往往跌市後都可以率先反彈，業績抗跌力強，除廣告業務繼續有增長外，手機版廣告與WeChat企業服務亦都開始有貢獻，都可喺大市下跌至19,400點落首注，跌至18,300點落第二注。

鄭：致富證券大埔分行經理 鄭文光（Raymond）

愈跌愈溝 股友大忌

Kitty：聽聞近排有唔少股友中招，搞到心情忐忑喎。

鄭：尤其係買中至大型股嗰啲，指數股固然跟大市跌，佢哋往往喺個市回啲又溝，以國壽（02628）為例，可以話係愈溝愈低，部分股友由18.8元開始買，一直溝到依家，綁死咗喇，佢哋覺隻股質素好，可揸住先，預計短期走勢唔會好，都要過埋六月份再算。

其他內險股，好似中國太平（00966）都係佢哋喺每次跌市中撈底嘅目標，唔少都已短炒變長揸，但換個角度睇，平均價拉低咗，用作長揸都係好事。

銀行地產 分注低吸

鄭：之不過，炒開細價股嘅股友今年成績又OK喎，事關大市走勢一般，多咗資金追逐細價股，加上今年唔少半新股當炒，尤其係啲建築股一度爆升唔少，佢哋雖然食唔晒整個升浪，但每次都賺十幾格就閃，而且唔坐貨過夜，以鎖定利潤減少風險。

彩兒：望住五月市況，搞到我晚晚失眠！

鄭：近一個月大價股走勢轉弱，有10日線跌穿20日線情況，經濟前景唔明朗，下月不明朗因素多、商品波動性大，股友傾向審慎，以短炒、唔過夜為主。佢哋信奉五窮六絕，較睇好下半年，唔算太悲，留意緊啲大藍籌，好似恒生（00011）、中銀香港（02388）、新地（00016）等，靜候回調分注低吸。

風高浪急 散戶各師各法

「爪哇十厘息揸得過」

散戶陳先生稱：「總括嚟講都唔滿意個市況，但相信下半年會有轉變。今年投資額冇改變，但係就賺少咗一至兩成，約七、八萬元。所以，主要都係會揸啲高息股，好似爪哇控股（00251），有成10厘息。另外，我都睇好環保汽車，好似和諧汽車（03836），因佢業務有持續嘅增長，而且前景較好。依家就希望銀行股可能穩定番，因都係佢哋帶住個頭，若佢哋穩定，其他股都會好啲。」

「港鐵三大王牌傍身」

散戶Ricardo表示：「今年個市喺20,000點左右徘徊唔係新鮮事，今年整體賺5位數字，主要係買港鐵公司（00066）及騰訊。我睇好港鐵，因為佢有三個王牌業務，即係鐵路、地產、廣告，其中地產業務更位於黃金地段，臨近港鐵站。我對個市唔絕望，不過當然唔可以預期個市會大升。」

「寧投資穩陣藍籌股」

散戶愛姐指：「今年個市好難玩！尤其係呢輪股市炒唔起，跌又唔係跌到盡，升又升唔起！仲想好似以前咁一日炒幾次？冇o架喇！」愛姐續指，「呢排我反而買多咗藍籌股，好似友邦保險（01299）、港鐵公司咁，起碼叫有息收！」以往她較喜歡炒二、三線股，因其回報甚高，十分吸引。雖以今年計，她仍是賺多過蝕，但已無過往般進取，其投資注碼亦相對減少，並改為投資穩陣藍籌股。

若有料報畀彩兒同Kitty或有嘢問，可電郵money.biz@on.cc

Kitty 彩兒