Market Insight：食品股不宜寄厚望

話口未完，上周港股收市後，人行公布四月新增貸款得5,556億元人仔，同大行預測的8,000億元人仔相比，打咗個七折，同三月1.37萬億元人仔相比，猶如天堂跌落地獄。權威人士到底係真權威？抑或純粹早收三日風，透過官媒放風，為資本市場做定防震準備？點都好，今時今日難怪個個芬佬，聽到有人硬銷buy China都無不耍手擰頭。

單係政策一時一樣，經已畀佢玩謝，第一季狂放水，內銀新增貸款破晒紀錄達4.6萬億元人仔，轉頭見樓市同商品期貨，因為超寬鬆流動性，炒到傳來陣陣燶味（尤其黑金屬商品），轉頭態度可以一百八十度轉，由狂泵水到突然閂水喉。話時話，咁做同之前推出四日叫停的熔斷機制，又有咩分別？

內地政策朝令夕改

一個唔成熟市場，加埋缺乏深思熟慮的政策環境，投資者如企在十字路口，一係同佢鬥傻，或者選擇唔玩，對於有咁上下規模，唔係咁容易轉到身的外資，入得場，必定要個故事有根有據，若然要二揀一，只能選擇離場。

正所謂：「一放就亂，一收就死」，其實唔單止限於股市，內地樓市亦大同小異。同老友傾開，在下仲笑呢位早兩年前，於深圳投資咗唔少磚頭的朋友，響過去一年深圳樓價狂升六成多之下，應該可以減磅歎吓世界。

殊不知，老友呻今浪只是紙上富貴，即使帳面升唔少，但要真正甩到手、落到袋唔係想咁容易。佢話自從一線城市先後出辣招壓抑泡沫後，於個多月之間，深圳二手樓成交急跌七至八成，等錢用的業主要放，唔「欖」價落返兩成以上，電話問都無人問吓，高價食胡根本係天荒夜談咁話。

講返個市，到底四月內地新增貸款數據公布後，會唔會令超賣的港股，來個終極一跌後之技術反彈，望就係咁望，但回顧個市，商品股瓜埋之後，好似一下子無晒炒賣古仔，如果阿爺扭細個水喉，唔係純季節性因素，銀行首季衝貸款鬆過龍，短期個市，尤其內地股市都咪話唔頭痕。

吉汽低位具承接力

上周提過，中汽協公布四月全國乘用車銷售數據，SUV銷情大幅跑贏，可惜個市唔就，車股未見炒上。

市傳內地短期刺激經濟措施將集中提振內需方面，包括延長低排量汽車稅務優惠，SUV加低排量車，古勝第一時間諗起吉利汽車（00175），月初出新SUV型號帝豪GS，主打年輕低入門低排量，近排股價由4.17元回落，上周五即市低位3.59元，已貼近保力加通道底3.55元，若今日個市低開，可以諗諗。

上周五內需股受追捧，其中食品股逆市靠穩，康師傅（00322）升3%、統一（00220）升1%、蒙牛乳業（02319）微升0.5%，旺旺（00151）則無升跌。

無論即食麵或飲料市場，競爭都相當激烈，先講三間台資企業，舊年業績就一般，由於人仔貶值，令康師傅及旺旺均錄得巨額外匯虧損，得統一能夠幸免，純利升1.9倍，各企業三月中公布去年度業績，統一憑着較亮麗的表現，股價跑贏對手。

另外，統一首季稅後利潤4.3億元人仔，美銀美林及滙豐證券分別發表報告唱好其前景，維持給予「買入」評級及上調目標價，美銀美林睇7.5元，而滙豐證券就睇8.6元。

統一後市水位唔多

於三月二十一日公布業績當日，統一股價上升逾6%至5.5元，隨後逐步向上。上周公布季績後，股價亦見支持，重上10日及20日線，高見7.58元，接近去年十月份高位。以上周五收市價7.45元計，距離52周高位8.19元仲有一成左右，但近期市況立到咁，股價要衝上去都唔易，無為高追。

至於蒙牛，去年與雅士利（01230）聯手向達能提出收購從事幼兒配方奶粉的多美滋中國全部股份。據外媒報道，蒙牛接近達成收購澳洲BurraFoods股權的交易，估計作價逾3億澳元。

雖然近年集團積極提升業務，惟內地食品安全方面時有負面消息傳出，要恢復消費者對本土品牌乳品的信心，仍然需時。

古勝