返足8粒鐘後收工？絕對係奢望。外國大學研究話，48%打工仔過去5年曾因工作感焦慮；31%搵唔到Work-Life Balance（工作/家庭平衡？乜來嘅呢可）；53%指工作令佢哋攰爆。人力資源報告話，依家啲人辭工，主因係覺得畀份工Chur爆。
點知有冇被Chur爆？最極端就係做做吓猝死，輕啲嘅就攰到暈低、仆親塊面拮親隻眼要縫針……全部真人真事。
未去到咁極端前，以下10大徵兆，睇睇自己中咗幾多個。絲絲？絲絲早已進化成為Zombie！
唔好淨係睇表面，內患都計埋！如果積勞成疾，出現背痛、沮喪、心跳、過肥、不時唔知點解頭暈身熱，你就要睇睇份工係咪仲適合自己。古語有云「病由心生」，癌症在中醫角度就叫「鬱積症」，驚冇！
壓力會令記憶力、決策能力、情感控制、集中力出現問題。發覺自己突然間犯下愚蠢錯誤、唔記得啲重要嘢、冇晒決策力、甚至情緒失控？嗱嗱嗱，一向都蠢開兼冇記性嗰啲，唔算。
壓力尤其影響人際關係，就算喺Office頂得住壓力，返到屋企亦可能會變「另一個人」，家庭生活亦會出問題。開始經常同人無謂爭吵？關係轉差？小心。
咁證明你已到咗「工作狂」階段，係嚴重被Chur爆信號。
就算夜晚瞓得好好，但朝早硬是起唔到身？仲一日到黑咖啡不離身、工作時難以清醒？嗱嗱嗱，生命無價，小心小心。
突然變得憤世嫉俗？覺得自己人工好低？全公司嘅人都庸碌無能？總之所有嘢都係負面、覺得全世界欠咗你？Oh Sorry，你被Chur爆了。
推動努力工作嘅原動力好多時係「滿足感」，一旦滿足感下降，必定影響你工作，亦係工作壓力爆煲重要信號。
原本幾咁「陽光」嘅你，有日返工突然主動性盡失、寧願Hea做算數？明顯係Chur爆咗嘅特徵，就好似一個洩氣嘅氣球。都係嗰句，一向Hea開嗰啲唔算。
你要經常回顧自己工作表現，1個月前係點？半年前？一年前呢？如果發覺愈嚟愈差，就要留心，你可能已經透支。
知道要減壓？Good！但靠吸煙、酗酒、蒲吧？呢啲似自殘多過減壓喎，係時候諗諗份工仲啱唔啱你。
中8個以上：有理由相信，隨時陣亡！
中6-7個：仲返到工識行識走，你真‧叻仔！
中4-5個：忍吓啦，好快退休o架喇！
中0-3個：你，Sure自己係打緊工？
余絲韻