Market Insight：電視機股選擇吸納

中國三月份之PPI錄得按月升幅，成為一個炒賣點，皆因被視為「告別通縮」的信號，然後商品期貨喪炒。四月份PPI很大機會持續改善，但氣氛此一時、彼一時，CPI若續上升，可能驚通脹甚至滯脹。

商品期貨升完又跌過，中央明令遏制炒風，聰明錢即時散水。前排股市回落，有人歸咎是資金流向商品期貨，但現時連商品期貨亦玩完，A股仍無起色，滬綜指昨再跌2.8%至七星期低位。

內地投資者唔炒唔安樂，呢一刻最旺係二線城市房地產，但相信亦近水尾。借勢炒深港通又冇乜迹象，有傳張德江日內訪港順便送禮，姑勿論深港通係益人定益自己，20,000點入市尚可一博。

造空A股絕不容易

昨日沽空金額比例升至16%，空軍似乎有恃無恐，再加上大行近期輪流唱淡，難道趁四月經濟數據回落聯手「造世界」？去年的故事是研究A股入MSCI吹脹個泡沫，然後夢碎爆煲；今年亦吹到入MSCI機會大過五成，但A股及港股表現已經大不如前，A股更由「國家隊」持貨達2萬億元人仔，要再造空A股已不容易。

不過，A股自己亦「放氣」，官媒訪問「權威人士」，大談「徹底拋棄試圖通過貨幣寬鬆促增長」、「L型經濟不是一、兩年能過去的」、「讓股市匯市樓市回歸各自定位」。

此外，中國證監會承認研究中概股回歸問題，換言之，此類股不再被「祝福」，搞到殼股大跌。去年肖鋼做中證監主席時號召在美上市大軍回歸，依家由劉士余做主席，則變成對殼股「睇唔過眼」，呢類「人治風險」長期窒礙股市進步。

內地「禁殼」本應有利「港殼」皇帝女唔憂嫁，但既然內地亦禁，香港焉敢不跟隨？昨日港股跌幅榜顯見一些「準殼股」，而賣殼終於再有動作之文化傳信（00343）復牌先升後跌，但最難仍是過上市委員會一關。

體育盛事有助短炒

至於文傳所收購之英超直播權公司，作價38.75億元非常高昂，但只知收購對象去年經營業務之現金淨額為4,800萬美元，而中國及澳門之直播權僅餘3季。內地唔似香港咁鍾意睇英超；相反，德甲、意甲、西甲仲多擁躉。

雖然現時多媒體普及，但睇波最享受都係同三五知己睇大屏幕。今年暑假有奧運同歐國盃，通常會帶旺電視機、啤酒及體育用品銷量，但亦只限短炒性質。

香港電視機股不外創維數碼（00751）及TCL多媒體（01070）兩隻，不過，兩間公司的銷量及股價表現差好遠；TCL四月LCD電視銷量按年升17.7%，而創維四月中國市場銷量減少14%，加埋海外市場總銷量則減少5%；所以昨日兩股分兩邊走，TCL升3.5%，創維則跌5.2%。

睇番條數，TCL四月真係好勁，單月已賣161.8萬台，而首四個月亦不過賣出323萬台，即係四月銷量已等同首三個月加埋，智能電視更升50.8%成最大增長動力。

TCL佳績，自然聯想到與樂視去年底入股有關，樂視以每股6.5元認購TCL擴大後股本20%之後，三月底聯手推出兩款分別65吋及55吋曲面電視，然後反映在四月銷量身上。

TCL夥樂視惹憧憬

TCL製造電視，樂視提供節目內容，電視賣得平去吸引用戶，然後分廣告收入。究竟呢種模式會否開創一片天？尚要放長雙眼，但TCL首季收入跌11.2%，純利卻升62.1%至7,388萬元，毛利率則增4.5個百分點至18.8%。

創維於三月年結，上半年度純利升5.5%至8.69億元，全年度業績最遲下月分曉。不過，公司一六/一七年度總銷量目標1,700萬台，中國和海市場目標分別升9.6%和36.1%，但四月總銷量得110萬台，達標信心令人大打折扣。

電視機股盈利波動極大，因此亦比較難預測，TCL勝在去年基數甚低，所以今年有高增長無疑問，但要回復合理PE恐怕仍需要作很大努力，極視乎與樂視合作的成果。四月份暫時是勝負分明，TCL短線相信可繼續跑贏創維。

古勝