絲絲講場：香港私人銀行新人荒
依家時勢唔係咁好，尤其銀行金融業成日都話削減人手，不過香港有一瓣幾咁渴人，就係私人銀行（PB）喇。
話說中銀香港（02388）私人銀行總經理曾錦燕（Wendy），佢亦係私人財富管理公會（PWMA）副主席。Wendy話，為咗吸引多啲後生仔入行，PWMA諗緊拍住香港嘅大學齊齊搞課程同埋Internship Program（實習計劃），希望啲後生仔係大學嗰陣，已經對私銀有基本認知。PWMA行政委員會主席盧彩雲（Amy）亦話，要壯大私銀業務，希望喺五年內可以Double人手與資金。
行內人才周圍跳
乜香港私銀咁渴人？Wendy話，新人入行比率好低，入咗行嗰啲又好似玩Music Chair（音樂椅）咁，成日轉嚟轉去唔同銀行。Wendy講開又話私銀營運成本好高，唔係開茶餐廳，而係好似開Steak House（扒房）或者五星級酒店咁喎。
話時話，絲絲聽聞，茶餐廳依家一樣好難請人喎。咁啲人究竟去晒邊？
余絲韻