絲絲講場：翁世權「牌」期再做輪王
自從渣打去年十月宣布撤出股票衍生產品同可換股債券業務，輪王翁世權（Simon）暫別輪場半年有多，絲絲收到風，傳Simon會加入一間歐資公司，喺香港新開輪枱，聽講間公司申請緊牌。
傳正申請1號牌
對於傳言，Simon話暫時冇詳情可以透露，但就話休息咗一段時間，覺得悶悶哋，想積極重投市場咁話。
據市場消息，Simon已經應承加入呢間歐資公司，但因暫時間公司喺香港仲申請緊1號牌（證券交易牌），所以好敏感，拎到牌後先落實到。即係邊間歐資公司？你估吓，貼士係間公司喺歐洲同埋新加坡市場已經有窩輪等衍生工具供投資者買賣，規模唔細。依排Simon一樣好忙，就係趁住「積極重投市場」之前，要先陪屋企人。
趁得閒睇歐國盃
佢就趁今年歐洲國家盃喺法國開波，特意喺六月同爸爸媽媽去歐洲玩番轉，仲已經買咗歐國盃揭幕戰（法國對羅馬尼亞）嘅門票，同爸爸現場觀戰咁話。「之前自己都去過歐洲現場睇吓聯賽、歐聯，但睇歐國盃都係第一次，大概六月會去兩、三個禮拜，到法國、英國、意大利等地方」，咦？咁Simon囝囝Trevor呢？噢Sorry，Trevor要返學，惟有留喺香港，不過有媽咪陪。
話時話，絲絲聽聞，啲公司申請牌照所需時間近排好似耐咗，要成八個月到一年。想聽Simon再講輪？睇嚟要等多陣。
余絲韻