孖妹S檔案：深港未通 券商先衝

廣招猛將等大時代

許：耀才證券行政總裁 許繹彬

彩兒：前一排啲深港通概念股嘅走勢睇嚟幾好喎，港交所（00388）行政總裁李小加早前都話技術上已經準備就緒，你有冇收到風係咪真係就快開通先？

許：我哋都冇內幕消息o架，都係跟番港交所講嘅方向，個人就覺得會喺今年第三季喇。

乜通都假 氣氛緊要

Kitty：滬港通推出近年半，反應好一般喎，滬股通同港股通截至上周四嘅累計剩餘額度分別佔總數約57%同46%，港股依家每日成交就跌到去五百、六百億元，深港通真係咁值得期待咩？

許：股市係講周期嘅，我覺得滬港通有份促使上年四月出現嘅港股大時代，只不過喺不同因素影響下，大市好快就有個調整，主要原因之一係內地中證監收緊孖展借貸，導致股票成交下降。

滬港通、深港通有冇用，其實係睇市場氣氛，當佢一嚟，咪有用囉。如果有一日中國市場穩定番，中證監放寬番孖展額度，我覺得個市會再次活躍起嚟。滬港通、深港通好依賴內地投資者氣氛，A股炒得興起，港股都冇理由靜吖。

彩兒：不過，你哋提供埋滬股通買賣服務，都應該要投放唔少資源，講真吖，依家有冇少少後悔先？

照舊免佣 漁翁撒網

許：為咗參與滬港通，要投資去整電腦系統同請更多人手，少啲資源未必成事，香港有四百幾間證券行，都係得百幾間有參與，有啲的確未必負擔得起。我哋就覺得值得投資，因為工欲善其事，必先利其器，若一開始冇參與滬港通，又點會迎合到上年四月個大時代呢？嗰時冇得玩滬股，啲客可能會因為咁而走。唔排除隨時再有個大時代出現個喎，我哋點都要做定嘢先。

Kitty：咁為咗深港通，你哋又會去到幾盡？

許：由於用嚟做滬港通個伺服器可以連接埋去做深港通，電腦系統上要投放嘅資源唔多，但會繼續請人，例如電腦、會計結算嘅職位等。

彩兒：你哋最近搞個大型招聘會，目標請成80個營業主任，又開多咗兩間分行，嚟緊仲諗住開多間，真係好積極吓喎。

許：如果個市嘅氣氛熾熱番，可能會有好多廣東省居民落嚟開戶，需要好多前線員工，我哋希望趁依家個市靜靜地，請到啲人才，到市旺嗰時就未必請到o架喇。我哋依家等緊大時代再嚟，雖然未必一定嚟，但做生意係要博o架嘛。

Kitty：到時深港通真係通車，你又會有咩招數吸引我哋炒A股？

許：係靠市場氣氛去吸引香港人買A股嘅，上年四月唔使叫啲人都會買啦。咁我哋照舊會用免佣策略啦，希望漁翁撒網，吸一批新客。深港通嘅範圍主要係啲二、三線股，上落比較大，對於投機客嚟講係欣喜嘅。

有番聲氣 重新推廣

陳：華夏基金業務拓展部總監 陳志豪

彩兒：你呢排好多搞作咁喎，唔通深港通又關你事？

陳：滬港通開通之前，我哋冇咩特別部署，但我哋上年推出咗隻華夏恒生小型股ETF（03157），計劃嗰時正值三、四月，個市炒得好火熱，預期年內會實行埋深港通。

滬港通南下嘅範圍，包括咗同時喺上海上市嘅H股，恒生綜合大型指數，同埋恒生綜合中型指數嘅成分股，所以我哋預期深港通南下部分，有同時喺深圳上市嘅H股，以及恒生綜合小型股指數成分股。我哋推出呢個產品嘅時候，希望配合到深港通個時機，點知之後上年七月份有個大波動，深港通遲遲未開通。

不過，最近有番啲消息，我估當局第二季內就會有詳情公布，下半年會實行，所以我會重新做番啲推廣，例如去搞吓研討會、拜訪吓啲銀行、券行同投資者，介紹番呢個產品，亦會同內地金融機構溝通吓，希望有港股帳戶嘅內地投資者都可以留意。

中小股波幅大矚目

Kitty：港股好似冇咩受惠滬港通喎，你覺得深港通真係可以令香港啲小型股炒起咩？

陳：滬港通對香港個市至今嘅影響的確唔係太大，推出後一段時間，AH股嘅差價反而擴大咗，最高去到45%，北上資金多過南下。

不過，今年以來，南下資金流已經超越北上，預計深港通推出後都會有咁嘅趨勢，原因係內地投資渠道比較缺乏，好多資金都希望做海外投資。深港通嘅範圍應該集中喺啲中小型股份，內地投資者鍾意炒呢啲波幅較大股份。

另外，香港中小型企業嘅估值較內地平得多，唔少深圳中小型股份嘅市盈率達60幾倍，相反香港好多都係10至20倍，所以預料深港通開通後，南下資金會再增強。

專家貼士：股友上車前諗定「錢」路

若深港通落實，大家會有乜投資機會？君陽證券行政總裁鄧聲興建議，投資者可留意港交所（00388）、券商股同埋市盈率較低嘅中型股，好似一啲市盈率唔夠10倍嘅工業、通訊及科技股等，博內地資金流出高估值嘅深圳股，轉買較便宜嘅港貨。

佢相信深港通開通後，較能帶旺港股投資氣氛，但稱恒指要重返去年高位就有難度，大家都係短炒好喇，唔好高追，如港交所暫時可喺180至200蚊水平炒吓波幅。到深港通消息確認，好可能係沽貨離場嘅機會。

深股慎玩 震過創板

至於港人應唔應該買深股，鄧聲興就話真係識先好買，畢竟深股嘅波動性隨時高過香港嘅創業板股份，一唔小心隨時輸錢。

招銀國際策略師蘇沛豐對深港通可帶起港股冇期望，料只有部分小型股有機會獲內地資金買進：「要睇深港通嘅股票範圍包唔包括恒生綜合小型股指數，因相關股份依家仲未被納入滬港通。呢批小型股入面，可能只有科技、消費品牌相關嘅公司資金會較留意。」

蘇沛豐認為倘深港通落實，難以對恒指沖喜，覺得港股「五窮」機會仍好大。佢提醒，一般人認為會受惠深港通嘅港交所，參考滬港通經驗，對該公司業績帶動好少，所以唔好盲目高追。

若有料報畀彩兒同Kitty或有嘢問，可電郵money.biz@on.cc

Kitty、 彩兒