上周五滬綜指跌2.8%收市，恒指跌1.6%，恒指話咁快又回落至四月上旬的水平，短線須考驗19,800至20,000點水平承接，反正指數無甚足觀，如今只有等阿爺動手做嘢！
國務院總理李克強講話就業數據與經濟數據同等重要，但其實就業數據不就是經濟數據的其中一瓣，所以都唔知應該點理解上大人呢番話的意思。
講到就業，無可否認是經濟穩定的基石，畢竟居民冇工開、冇收入，講甚麼「強」都冇用。所以點解呢幾年內地經濟增長放緩，但官方對汽車業的支持有增無減，皆因汽車業僱用大量勞工，對穩定就業市場起重要作用。
回說市況，短線趨勢利淡，選股亦轉趨保守。今日講吓環保股光大國際（00257），筆者在三月初曾品評光國，話可以分注低吸，當時股價最低見過8元邊，四月份曾回升至9.35元，之後又再回落，上周五收報8.35元。
光國優勢在於行業增長前景未受宏觀因素影響，而股東背景亦令其於取得新項目及控制應收帳款等方面優於其他民企同業。
走勢上，推介至今三組波浪，但波幅都不出8.2至9.2元水平，見短線10日線有勢下試50日線支持，且MACD及RSI等技術指標均轉弱，今趟似乎有機會又可在8元邊或樓下上到車，若然冇貨在手，不妨留意低位承接。
司慕渢