絲絲講場：26萬租先達舖王財技谷數
旺角先達廣場昔日舖王所在嘅魚蛋檔文記果汁食品回歸啦，「各位，埋嚟，埋嚟，十蚊一串咖喱魚蛋！」係咪好有港式風情呢？絲絲先前搶先訪問咗文記嘅老闆盧劍波，佢承認以月租26萬元租下這個先達最貴租嘅舖王，並好激動咁話要趕喺今個月開業。
劈價8成 兼玩分拆
結果，昨日傍晚文記正式回歸先達舖王，學樓市咁劈價8成以兩蚊串魚蛋谷數之餘，仲玩「分拆」，至頂得順個租。
之不過，家陣香港哋經濟一日差過一日，佢啲「財技」得唔得？絲絲屈指一算，文記26萬租，單以魚蛋計，每日要賣幾多串魚蛋先至夠交租呀？以正價10蚊串魚蛋，一個月30日計，每日營業額要8,667元左右先至湊夠數交租，咁咪即係要每日賣867串魚蛋至夠！咁文記自己估一日可以賣到幾多串魚蛋，老闆盧劍波笑言，呢個係商業秘密！
盧老闆拍心口話，回歸先達舖王，計過晒數，有信心會有錢賺喎！事實上，為了應付貴租，盧老闆就諗到同非食店分租，將舖王「分拆」咗一忽畀手機維修店。
文記回歸先達舖王，盧老闆笑笑口話：「九六年到○四年我哋一直喺度，搬咗去先達後邊角落嘅現舖位都係前兩年嘅事，依家返嚟喇！」佢今朝一早就落舖睇實裝修進度，「一裝修好，就即刻開舖！」
兩蚊珍寶珠都買唔到啦，但呢個禮拜文記會推出兩蚊串魚蛋。新舖照舊有煎釀三寶、鐵板燒等嘢！一開張，先達門前篤魚蛋嘅畫面又重現。盧老闆語重心長咁對絲絲講：「市道差，篤番串魚蛋都得啩！」
余絲韻