期指觀瀾:守21020吼位再買

美日紐央行議息,加埋期結,昨日個市有波幅、無升幅。恒指早市最多升293點,之後受A股回落,期指大戶見結算價「有着落」後放軟手腳,指數一度落到21,255點,午後好淡友亦擺出買賣兩閒姿態,埋單計僅升26點報21,388點。

恒指即市波幅較大關係,主板成交增至677億元,五月期指以200點低水收市,日市收21,188點,即使剔除除息因素,亦要低水71點。昨日好友未能把握破位機會,趁指數升穿四月高位21,634點再下一城,只能怪時不與我。

尚幸恒指還企住10日線樓上,未即時回試21,103點甚至21,002點的近期低位支持,走勢未算太差,至多浪費一次機會。手上好倉進入21,530至21,803點食胡範圍,昨日見現貨破位唔行,雖然唔算高位,但都追到落平均21,400點先食胡,只要21,020點唔失守,今日或等機會再買番。

John Mullen