Market Insight：券商股暫難破悶局

成個市都預日本會出手，最後按兵不動，議息結果一出，隻yen掃到上107.92，差些少掂到早前做出的今浪新高107.63。老實講，年初推負利率惡評如潮，負面作用比正面刺激大，市民對央行信任度固然每況愈下，銀行業利潤空間收窄，對經濟前景的不安更蔓延到其他商業活動，在圓匯升到爆底下，短期通脹及經濟增長目標更加唔使提。

息口敏感股再發圍

目前，即使日央行來個撥亂反正，收番負利率，又或者極有限度推低負利率，被都看成推升圓匯的催化劑，已經加又死減又死，一二年的「安倍經濟學」主張透過量寬推低匯率刺激經濟的想法，經過今鋪，基本上都可以宣告玩完。

升穿四月中高位方塊的關鍵時刻，昨日居然衰喺臨門一刻，展望勞動假期港股下周一休市，今日靜局在所難免，兼下周又踏入「sell in May」的基金傳統淡季，炒家們都係一動不如一靜。

昨日見比較精神的係利率敏感的REITs及地產股，好似新地（00016）及長實地產（01113），由二月低位至今累積升逾兩成及四成，美國加唔到息，發展商劈價下市場交投回暖，相信普遍股息率幾吸引的地產股，仲有力再上。

內地券商股陸續公布首季業績，對比去年首季牛氣沖天，今年A股的不濟，條數水瓜打狗，可說是預期之內。海通證券（06837）首季溢利17.54億元人仔，大跌57.2%，同樣對比一年前25元的股價，昨日得13元亦係唔見一半。

A股估值明顯偏高

三月A股交投轉旺，多隻券商股營收都比一、二月回升，股價谷底反彈，可是到三月尾證金公司鼓勵兩融，加上中國宏觀經濟數據好轉，反而A股唔多領情，交投再度回落，也令幾隻券商股的反彈陷入膠着狀態，說穿了，又係同A股估值貴有關。

依家兩市平均PE大約27倍，比歷史21倍高，加埋一六年A股上市公司業績預咗麻麻，估計整體估值進一步升到35倍樓上，如果上市公司業績展望不是V形，而是U形甚至L形反彈，咁又難怪個市同券商股都牛牛皮皮咁姿態。

本月初公布以約37億元收購華潤醫療資產的鳳凰醫療（01515），現時為內地最大的醫院集團，收購有助集團擴大規模同業務網絡，以迎合內地對醫療服務的剛性需求持續增加外。鳳醫主營醫院，近年亦拓展診所業務，與聯合醫務（00722）合資成立合營公司，在京津冀地區開設診所。

鳳醫開拓診所業務

集團去年收入為13.7億元人仔，按年增13%，相信未來仍有穩定增長。走勢上，鳳醫在四月八日公布收購消息，四月十一日復牌隨即裂口上升，惟至今仍在11元附近橫行，明顯受制於250日線11.2元阻力。

另外，聯合醫務現時逐步發展內地業務，先在北京、上海開診所，預計年內開業。內地人一般即使是小病，亦會選擇到醫院，診所可以話係新模式，但隨着內地對於私人醫療服務需求上升，長遠或成為盈利增長動力。於內地經營醫院仲有和美醫療（01509），惟和美定位係私立婦產科專科醫院，內地實施二孩政策，相關服務需求或增加。

古勝