絲絲講場：莊偉忠退休想做顧問
一田百貨「不開會的CEO」莊偉忠下周四就同一田講拜拜，尋日就同傳媒嚟個臨別秋波，佢爆自己好眼淺，呢幾日諗諗吓就走都想喊喎！佢再次解釋唔撈嘅原因係一田上咗軌道，自己喺呢份工上已搵唔到滿足感，所以去搵第二樣嘢做。
莊生做咗一田CEO八年半，佢感慨離職最遺憾嘅係留低班同事。但佢又再澄清，三年前已開始準備交棒，同家人商量一年後先作出退休決定，同母公司新地（00016）管理層無關咁話。
「可以退休、唔可以唔做嘢」嘅佢話自己呢一刻未有新工，自從離職消息傳出後，收到好多唔同嘅公司邀請佢加盟，而佢最想做顧問，同埋呢兩個月都會忙演講、拍廣告同寫專欄，分分鐘仲忙過返工！
余絲韻