絲絲講場：恒生搞晚宴嘉許善心同事
唔少企業都會搞下義工服務，盡吓社會企業責任。話說前排恒生（00011）搞咗個義工嘉許晚宴，義工服務時數多嘅員工，當然要讚一讚、畀番個叻佢啦，聽講今次有六個義工喺舊年嘅服務時數超過200個鐘，恒生執行董事兼零售銀行及財富管理業務主管陳力生（Nixon）都有出席嘉許禮。
咦，200個鐘？咪即係八日有多？香港人平時返工已經鬼咁忙，放咗工又鬼咁攰，放假就梗係想抖一抖回一回氣啦，呢六個員工咁有心，絕對抵讚啦。
兩日假期鼓勵員工
原來恒生員工唔止放假做義工，返工時間都一樣可以參加義工活動，每個全職員工仲可以有兩日義工假期添。
弱勢基層兒童、長者、少數族裔青少年都係佢哋嘅服務對象，計絲絲話，一班員工一齊做義工唔單止幫到人，更加可以建立團隊精神，做起嘢上嚟都特別有默契添。
余絲韻