絲絲講場：24句打工仔不能說的話
香港失業率惡化，大嗱嗱13萬人無工開，兩年幾以來新高！咁嘅時勢，要保住飯碗，唔單止要靠拚搏，仲要小心自己把口。對住老闆或者上司，以下呢24句千祈唔好講。
1. 「我做唔到」
等於同上司講，自己無信心兼唔願試。
2. 「做開係咁」
咁即係你懶，唔肯試其他方法。
3. 「我同佢合作唔到」
同「我唔受佢玩」無分別，仲小學雞咩！
4. 「唔知喎」
應該立即承諾搵出答案，而唔係答句「唔知」然後齋企喺度。
5. 「我盡量試吓啦」
倒轉你問老闆月尾出糧，佢答「我盡量試吓啦」吖嗱。
6. 「唔係我工作範圍喎」
等於同人講，以後除咗大信封之外，乜都唔使預你。
7. 「唔得」
「唔得」並非唔講得，只要記住即刻解釋點解唔得，或提出反建議。
8. 「我啱啱失咗戀，做唔到嘢」
咁你應該返屋企搵阿媽呵番，返工唔啱你。
9. 「你錯」
其實可以對老闆講得婉轉啲，而又無損坦白。
10. 「我估」
斷估，擺明畀人哋知自己無料。
11. 「點解佢有我冇？」
你想要嘅嘢，就直接去爭取，唔好呻，亦唔好拉埋其他人嚟講。
12. 「你上手都唔係咁做」
唔該你記住，依家邊個先至係你上司。
13. 「我以為……吖嘛」
做錯嘢仲咁多辯駁，爽爽快快認錯好過。
14. 「對我有咩好處先？」
咩都計較，咁驚蝕底，擺明冇團隊精神，等住畀人踢出局吧。
15. 「Sorry囉，不過……」
仲解釋，即係冇悔意啦。Sorry之後嗰句只可以係「我以後會多加留意」。
16. 「我已經盡咗力喇」
被問責時咁答，擺明係逃避責任。
17. 「我好忙，等等得唔得？」
老闆追得，就梗係佢認為趕，你應該問聲是否有啲工作優先次序改變咗，而唔係叫老闆等你。
18. 「佢好乞人憎」
中傷人，你估老闆會點睇你。
19. 「我上一間公司都唔係咁做嘅」
咁你不如返番去做吧。
20. 「唔關我事，係佢咋」
卸膊，死罪也。
21. 「我想直接同你上司（或人事部）傾」
越級挑戰冇好結果。想搵人事部傾，直接去就得，事先張揚等同威脅。
22. 「呢啲嘢冇可能做到」
畀着你做上司，下屬乜都話「冇可能做到」，你會點？
23. 「好悶」
搵第二個呻，唔係向老闆呻悶。
24. 「咁嘅話我會辭職」
咁威脅老闆，佢實成全你。
余絲韻