Market Insight：滙控下跌空間唔大

油價壞消息不死，加上美金續疲弱，其他商品乘機炒高，內地白銀、螺紋鋼、熱卷、棉花、焦炭、鐵礦石等期貨均大幅上升，所以石油、煤炭及金屬股的表現特別醒神。油價回升其中一原因是科威特石油工人罷工，但中國經濟改善因素可能佔更大助力，港股話晒係中國以外第二最大得益市場，近期表現仍然覺得遲滯。

道指經已重上18,000點關口，而恒指尚差約350點才能收復今年失地，原本以為突破21,000點後成交可望回升，但前日跌市成交特少，昨日升市成交亦不過635億元，顯然投資者對升市尚有保留。

股市慎防物極必反

環球股市近期連過兩關（中國數據周及油國會議），下一關是下星期美國聯儲局議息。當然，今次加息機會近乎零，但如果美國計劃今年加息兩次及六月先加一次，今次會議便要作出強烈暗示。

近期股市太強，但所謂物極必反，到「五窮月」或是淡友反擊時。傳統上，四月股市表現例佳，尤其美股處於業績期，仍舊玩「盈利倒退，但好過預期」這一套。

大摩首季盈利少賺54%，但好過市場預期，呢排一眾國際銀行股都以同一原因而上升。除此之外，油價硬淨亦唔使驚能源貸款變壞帳，風險降低變相提升估值。滙控（00005）卒之重上50元大關，昨升3.67%成推升大市火車頭。在超低息甚至負利率下，國際銀行股盈利受壓恐怕有排捱，但短線冇乜特別負面因素，稍為追回落後部分都好應該。

投資者現時關心滙控股息多過市盈率，之前8厘幾息都冇人敢買，驚住股息未能抵銷股價跌幅。依家股息回落至7.8厘，不少大行睇死滙控將來要減少派息；由於滙控股息實在太重要，管理層反而唔敢輕易減少派息，所以之前末期息仲要象徵式增加1美仙。

主席范智廉將於明年退休，亦有消息指行政總裁歐智華最多留任至一八年，臨走前冇理由拆自己招牌，所以古勝相信未來一、兩年至少可維持現時派息水平。

回購有時好過派息

在前日香港非正式股東會上，管理層承認不滿意股價，亦表示研究進行回購。資金用於回購有時好過派息，因為現時最主要是信心問題；美股咁強勁亦是企業回購有功，據高盛研究報告指，中國投資者去年共出售960億美元的美股，相當於過去六年牛市的投資額，但相對去年美企回購金額高達5,610億美元，足夠彌補「外資」走資有餘，今年美企計劃回購4,500億美元股票，繼續可托住美股。

講番滙控，升穿50元後又遇大摩潑冷水，話香港銀行業面臨完美風暴，滙控目標價得45元。不過，大摩早前更話滙控「最熊」睇28蚊，恒指最衰見14,000點，大家無謂太認真。

況且，就算跌到45蚊亦即大約一成下跌空間啫，扣番8厘息更加有限。當然，滙控早非炒賣對象，前景艱難亦毋須多講，但股友難拒8厘息誘惑，相信未來兩年不會貿然減派息，不妨繼續持有，如無貨者則可等機會，「五窮六絕」就快來。

聯通未有大行唱淡

三大中資電訊股昨日股價受壓，中移（00941）及中電信（00728）分別跌0.5%及1.4%，而日前發盈警的聯通（00762）就跌近2%。去年各電訊營運商的收入因受到「數據不清零」、「營改增」的影響而下降，加上4G市場的競爭加劇，表現麻麻，只有中電信的盈利有增長，去年賺200.5億元人仔，按年上升13.4%，ARPU微升0.1%至54.1元人仔。

聯通將於明日公布首季業績，預計盈利按年大跌85%，至4.8億元人仔，主要由於銷售費用及成本上升。不過，多間大行包括瑞信、摩根士丹利同野村昨日並未有將其評級及目標價調低。其中野村指，聯通的首季表現不理想，是預計之內，但相信與中電信在4G發展上合作，有助集團逐步踏上復甦的步伐。

唔少大行此前仍然睇好內地電訊行業發展，中移及中電信亦會陸續公布首季業績，數據表現有否改善，好快就會知曉。

古勝