絲絲講場：日央行終於有番女委員

日本政府周二任命外匯專家政井貴子（Takako Masai）做日本央行政策委員會委員，取代六月會離職嘅石田浩二。政井貴子今次入局，會係唯一一位女委員。

日相安倍晉三上台以來，一直話要發揮女性生產力，又話想喺二○二○年東京主辦奧運前，將日本管理層女性佔比提高到30%！不過睇番佢哋央行，舊年嘅管理層女性佔比得8%，仲差過當地私營銀行（8.7%）！

去到董事或更高級別，日央行嘅女性佔比仲低，舊年得4%。不過佢哋話會改善，仲定咗目標，兩年後會推高到5%，去到二○二三年會有10%咁話。七年後先得10%？咁都叫做目標，唉！

余絲韻