絲絲講場：朗詩田總超薄卡片好環保
朗詩綠色地產（00106）話明做綠色建築，當然要事事都做到環保至上。執董兼主席田明就以身作則，將張卡片印到超薄，係薄到透嗰隻，側邊仲有壓線，佢話「好像開支票一樣撕出來，很方便！」
田總話係佢自己要求印呢款超薄環保卡片。不過CFO（首席財務官）劉斌同其他公司管理層張卡片雖然都係用環保紙印，但就仲係舊嗰隻正常厚度。田總尋日一聽到，就即刻同CFO講「你們也快點跟我轉！」
唔Buy自然區起豪宅
其實田總一向都好Casual，絕對唔離地，佢同傳媒食飯都係着件格仔恤衫孭背囊，一啲架子都冇。席間佢仲話朗詩一向都係做中產樓，好少做豪宅。點解？事關佢唔認同喺自然景區起豪宅、用大量雲石鋪設呢種價值觀喎。絲絲聽完，即刻想畀個Like！
余絲韻