期指觀瀾:破位追勢 好過斷估

大市成交愈玩愈縮,昨日主板僅518億元。個市水盡鵝飛,偏偏期指相關買盤頂住幾隻重磅股,形成指數不跌的弔詭情況,恒指埋單升63點報20,504點,期指轉炒低水,日市收20,470點,低水34點,由成交減少近3萬張,似乎周一的即市炒家已鳴金收兵,從超短線挾淡活動中食胡離場。

昨日恒指全日波幅唔夠139點,雖然第二日企住10日及20日線樓上收市,可是一連兩日成交不到600億元,令到今次由20,045點開展的後抽,說服力明顯不足。筆者維持恒指確認升穿20,772點及20,872點兩個阻力,破壞短期頭肩頂形態,好倉客方可安枕無憂。

技術走勢上,恒指身處保力加通道中軸20,443點之上,可是後市要向上突破,大前提必先有成交配合。股市常言道「十個牛皮九個淡」,今次會唔會係一次例外,期指客無謂估估吓,上破20,891點或再跌穿20,250點先去破位追勢,總比在上落市亂石投林,浪費時間好。

John Mullen