絲絲講場：韓國經濟靠晒喬妹
聯儲局突然勁放鴿，搞到日圓食錯藥搏命升，靠平円搵食嘅日本旅遊業，真係多得佢唔少，但估唔到剋星南韓揀正依家風頭火勢，整套《太陽的後裔》出嚟，分分鐘撬走晒消費力至勁嘅強國旅客。
朴槿惠勁讚韓劇
《太陽的後裔》有幾勁？宋慧喬（圖）代言嘅Laneige唇膏，三月喺南韓銷量按年飆升360%，多得強國同胞邊睇劇邊爆買。亦因為咁，南韓化妝品首季海外銷售額按年增長22%，同整體出口按年倒退13%簡直係冰火兩重天。套劇二月廿四日啟播，Laneige生產商愛茉莉太平洋股價去到尋日計已累升12.4%。
之前《來自星星的你》經濟效益達到67.8億港元，相當於現代賣出2萬幾架Sonata房車。今次《太陽的後裔》個勢仲勁，真係照起南韓經濟，連總統朴槿惠都話靠佢食胡咁話。
余絲韻