絲絲講場：瑞銀教你計點至算老

後生睇頭髮 中年講退休

瑞銀財富管理剛剛出咗個《投資者觀察香港2016》調查，發現不同年紀對點開始係「老餅」，有不同定義。80後、90後（18至35歲）睇外貌，佢哋大部分認為有白頭髮就開始係老；屬於X世代嘅中年人（36至55歲）認為退休就代表老，似乎睇經濟能力多啲；至於屬於嬰兒潮世代（55歲以上）就多數認為追唔上科技就真係老。

女人未退休先認老

調查又發現，幾多歲算係老，男人同女人睇法亦唔同。67歲退休年齡前已經覺得「自己已踏入晚年了」，咁諗嘅女人有51%，男人只得35%，好明顯女人比較容易「認老」。

所以話，咩係老，其實主要睇個人心態。想回復年輕？Easy，再做番年輕時做過嗰啲蠢爆事，包你立即變Young，敢冇？仲有乜好驚，反正都一把年紀。

滙豐請老友記 堅識貨

同樣係銀行，高盛想慳錢，就寧願炒舊人請新仔，滙豐反而睇中啲退休「老友記」做兼職。

吸收各行業經驗

唔知大家入開滙豐銀行，有無留意到一班年紀比較大嘅分行大使呢？原來呢班老友記大有來頭，退休消防員、警察，連退休校長都有，非常高質。滙豐香港行政總裁施穎茵（Diana）話，滙豐睇中一班退咗休但仍然好有活力嘅長者，所以搞咗個Smart Senior（智醒老友記）計劃，專請老友記做兼職。計劃受長者歡迎之餘，客戶同分行同事都猛讚老友記好幫得手，依家滙豐嘅智醒老友記已經達到160人。

除此以外，絲絲仲聽講，滙豐另外亦有請啲有銀行工作經驗嘅退休長者，專門喺內部講Talk及分享經驗添。所以，識貨的話，老直頭係寶。

蔡太85歲大壽勁風騷

講到堅，真係要數「股壇大姐大」蔡陳葆心同佢老公。蔡太最近85歲大壽，但一啲都冇現老態，喺中華總商會擺咗四圍賀壽，一向貪靚嘅蔡太，當日揀咗套黃色小鳳仙裝慶祝生日。佢成班老友記，好似周文耀夫婦、許照中夫婦、李君豪等到賀，蔡太興奮到全場飛。

老公狂食肥膏冇「三高」

蔡太老公仲勁，今年94歲，老如松柏，佢哋阿仔蔡思聰仲爆老竇養生之道係「從不戒口」，每個星期有5至7日食膏蟹，換言之，差不多日日無膏蟹不歡。佢老人家更鍾意食肥豬肉、同雞Pat Pat等，但完全冇「三高」（高血糖、高血壓、同高膽固醇）。佢老人家仲有一樣羨慕死絲絲，事關佢塊面仲係脹卜卜，完全唔使做乜Facial打botox。唔通佢食得肥豬肉多，有足夠骨膠原？

余絲韻