投資U WIN：U界勇試大行IN人術

科學題

1）一架校巴能裝多少個高爾夫球？

科技大學計量金融學三年級生陳世康（Jonathan）以人的體積來做單位，「當佢係一架50座嘅校巴，估計全架嘅體積大約可以載到80人，而一個人嘅體積大概等同1,000個高爾夫球，所以我估8萬個。」

至於科技大學環球商業學一年級生田梓弘（Chevan）及中文大學系統工程二年級生應佑杰（Stanley）都先估算校巴的長、闊、高，以及每個高爾夫球的體積，然後整除，分別估180萬個及96,000個。

合眾人事顧問總經理蘇偉忠指，因問題未有指明校巴的體積，所以就算三位學生估算有分別，但也證明學生都有好的邏輯推論。

科大環球商業學一年級生 田梓弘（Chevan）	中大系統工程二年級生 應佑杰（Stanley）	合眾人事顧問總經理 蘇偉忠

2）為何井蓋是圓的？

Jonathan指：「地下水嘅水柱通常係圓柱形，所以井口就打做成圓形，所以要用相若大細同形狀嘅井蓋蓋住。」

Chevan稱：「井有深淺之分，如果係深嘅井，會用機器拉動水桶打水，而水桶多數係圓，所以井同井蓋都係圓。」

蘇偉忠指，建議答案可能是跟圓形的順滑表面有關，能減少摩擦力；但不論有否想出最終答案，欣賞他們有盡力嘗試解決問題，且勇於思考及想像。

自我認知題

1）你對個人最不感自豪的是甚麼？

Jonathan指：「我對數字好敏感，但電腦愈來愈普及，計算及核數已經唔算咩專長，所以我唔覺得自豪。」Chevan則指，「我唔滿意自己做事衝動及大意。」而Stanley就自信十足的回答，「我並無咩唔感自豪，雖然我比人矮，同帶眼鏡，但係轉個角度睇，其實都幾似文青喇！」

蘇偉忠提醒同學，不要在面試時談自己的缺點，但有些缺點，例如對手頭上的工作或過度着緊，僱主反過來會看成優點，欣賞該員工做事認真的態度。

2）給自己的怪異程度打分（1分為最低至10為最高）

Jonathan給自己6分，「我同朋友有啲唔同，我好注重整潔，間房一定要執整齊，住宿嗰時兩日必定洗衫一次！同埋我溫書要好靜，有時仲鍾意面對住牆溫添。」

Chevan給自己10分，「我由細到大都好鍾意唱歌，成日都好想唱；又鍾意大聲笑同搞爛Gag，係好奇怪o架喇，但我係個開心果。」

Stanley則給自己爆分12分，「我好鍾意諗嘢，有時諗到搞笑嘢，就會自己喺度笑，其他人可能覺得我怪異！」

蘇偉忠較欣賞Stanley的演繹方法，因為他有將答案串連到某些工作上需具備的特質，包括豐富的想像力，借機展現自己的能力。

假設題

1）如果你有超能力，你最想成為誰？

Jonathan最想倣效臉書創辦人朱克伯格，「我好欣賞佢嘅創意同奮鬥心。而且佢唔係啲貪錢貪權嘅人，Facebook股價升，身家多咗，就會諗辦法回饋社會！」

Stanley說，「我想用超能力去令自己同人哋都活得更美好，例如幫人發掘潛能。」

蘇偉忠稱，無論同學有否特定偶像都不緊要，最重要是把超能力發揮到正面效能。

2）如果你繼承了叔叔的Pizza店，你會怎樣經營它？

Jonathan稱，「我會搵會計同財務分析師去量化公司過去嘅業務表現，諗辦法增加銷量，仲可以諗埋轉型！」

Chevan則指，「我會想改良顧客點餐嘅服務體驗，畀佢哋用電子平板電腦點餐同自選配料及醬油嘅分量，提倡健康飲食習慣。」

蘇偉忠欣賞同學會在舊經濟模式上注入創意新思維，提到減省成本、提高營運效率。

3）若你要重新創造橙，你覺得它該是甚麼樣子？

Chevan稱，「橙皮都要食得！」Jonathan指，「橙入面要有甜甜哋嘅啫喱就中和到酸味！」

蘇偉忠指，題目考學生的分析力及創意，特別是上班開會時，上司一般都希望員工能主動提出富新鮮感且可行的意見。