孖妹Ｓ檔案：細價股血淚 博炒定攬炒？

慘蝕嚇怕 轉攻牛熊

C：散戶Captain

彩兒：今年以來，中國罕王（03788）、中國天化工（00362）、大健康國際（02211）、恒發洋參（00911）等多隻細價股先後暴瀉，其中恒發洋參更單日跌逾九成，而公布「先合後供」嘅毅信控股（01246）就出現咗跌到落1仙、有段時間有沽盤冇買盤嘅奇景，真係一地花生。

Kitty：Captain，兩年前我見你炒「8」字頭嗰啲創業板股份炒到興高采烈個喎，做咩依家停晒手呀？唔通你都被呢股妖氣嚇走咗？

C：大學一年級嘅時候透過參加模擬投資比賽開始認識股票投資，嗰時自己本金唔多，咪炒細價股囉，幾千蚊都可以入場吖嘛。不過大約一年之後，自己蝕得多，市況又唔太好，好多股由之前可以炒起四、五日，變到炒一、兩日就已經散水，咁咪唔玩細價股，轉玩牛熊證囉。

睇橫行炒上行唔通

彩兒：其實究竟要蝕幾多先可練成唔再炒細價股嘅決心呢？

C：嗰時夾埋蝕咗六、七千蚊，都佔咗我身家一半o架喇。

Kitty：咁多隻細價股，你會點樣揀嚟炒？

C：我會留意一直喺某個區間橫行嘅股份，呢類股似係畀莊家收緊貨，跟住就等佢被炒上。同埋我會睇番隻股之前嘅走勢係點，比如之前多數橫行咗幾耐會被炒上，炒嘅話又會炒幾多轉。

彩兒：咁玩法，命中率又會有幾高？

C：其實唔會好高，買十隻可能得三、四隻賺錢，就算知道莊家之前玩法，佢都可以變，始終自己消息唔係咁靈通。有時買咗啲橫行咗一段時間嘅股份，點知隻股冇炒上，照舊向下炒，出消息公布合股再供股，咁咪輸得甘囉！

（目及）實莊家跟風搵食

周：散戶周澤仁（阿仁）、黃：散戶黃啟賢（Jackie）

彩兒：你哋係中學同學，又係同事，依家仲拍住炒細價股，唔通真係兄弟同心，其利斷金？

Kitty：你哋又係點樣踏上呢條炒股之路o架？

周：我一一年畢業出嚟做嘢，儲到少少錢，開始投資股票，嗰時啲分析話中國熔盛重工（01101）（現稱華榮能源）呢隻股已經跌咗一半，又有新嘅投資計劃，跟住就畀佢吸引咗，買咗人生第一隻股份。點知隻股再跌，我二萬蚊嘅本金咁就冇咗一半，等於蝕咗成個月糧，完全唔知發生咩事，之後反反覆覆都係跟風去炒。一四年尾研究財技嘅熱潮興起，坊間出咗幾本相關嘅書我都有睇，又去上堂學呢方面嘅嘢。

黃：我係畀阿仁拉埋一齊去學o架，未學之前都唔敢貿然入市。學完之後，我覺得市場上嘅莊家有方法賺錢，散戶自然可以睇吓點樣跟風，透過了解佢嘅動作，睇吓點樣可以搭順風車。

除淨前買博發紅股

彩兒：研究咗咁耐，你哋有冇一招半式教吓我哋？

周：財技方面我哋主要炒發紅股，我哋留意到啲發紅股嘅細價股，喺除淨前一個星期好多時都有唔錯嘅升幅，所以會喺呢段時間做炒作。選股會有幾個條件，第一係睇佢大股東嘅持貨比例係咪夠高，係嘅話會相對安全，仲要睇大股東嘅持貨成本，若果同我個買入價相差太遠，潛在嘅下跌幅度理論會較大。

黃：仲有送紅股嘅比例要大，好似1送8或以上。我第一隻買嘅股票博華太平洋（01076），買嗰時見佢有轉倉，好好彩過幾日佢就公布每一股送十五股紅股，刺激股價上升，我獲利套現後，再喺除淨前一周買入短炒，前後賺咗三成。

大市受挫宜避風頭

Kitty：不過所謂再鋒利嘅刀都會有生銹嘅一日，你哋又有冇試過失手先？

周：我哋上年七月炒仁天科技控股（00885）送紅股，喺佢除淨前買入，點知撞正A股爆煲，隻股單日急跌到冇接盤咁滯，搞到我哋蝕咗三成。上年四至六月有賺到三至五成回報，但下半年有一半錢要輸番出嚟。呢次經驗令我明白到隻股即使做咗啲咩財技都好，都係會受市場氣氛影響，唔係話有財技就無敵，依家如果見市況唔好，會選擇避一避先。

彩兒：咁除咗炒送紅股，啲細價股仲有咩玩法呀？

周：我會儲一啲有機會賣盤嘅股份，當作儲錢，之前見有隻股份大股東增持股權去到六、七成就開始儲，中間隻股升升跌跌，我都冇理，有機會反而加貨，因為我信佢遲早都會賣盤。

專家建議：炒得安全要識呢啲

孖妹投資向來都做足功課，炒細價股咁高風險，事前梗係要向專家攞番幾個錦囊傍身啦。

創僑證券副總裁蔡佑徽就畀咗部分法寶

1. 暴瀉前或有迹象

唔少細價股嘅股東同時都會揸住啲大價股，並且做孖展，所以啲大價股下跌幅度大的話，佢哋有機會被人斬倉，賣埋啲細價股套現，有火燒連環船嘅效果。

唔少細價股暴瀉前，已經跌咗一定幅度，兼且成交上升，有迹可尋。以恒發洋參（00911）為例，該股喺一月廿八日暴瀉前一星期，已經連跌多日，交投由幾千萬升至過億元。

2. 跌得多唔代表抵

啲股份通常跌到好低殘先會合股再供股，所以唔好以為跌得多就代表抵；投資者最好了解清楚公司嘅背景，睇吓公司以往會唔會有多次合股供股、向下炒嘅紀錄。

3. 半新股風險較低

近排最好都係炒吓啲半新股，因為公司喺上市半年內唔可以做太多財技，如配股及供股咁，股票供應穩定，同埋唔會有太大嘅蟹貨嘅壓力，所以比較穩健。投資者亦可以留意貨源歸邊嘅半新股，佢哋喺上市一年內好多時都可以被炒起。

另外可以炒吓啲上市一年後有機會賣殼嘅公司，炒嘅話要留意佢哋有冇股權變動嘅消息，如發行可轉股債券等。

若有料報畀彩兒同Kitty或有嘢問，可電郵money.biz@on.cc

Kitty、彩兒