Market Insight：鐵路股走勢續改善

上星期得四日市，同近排回南天氣一樣，港股悶得令人昏昏欲睡，全星期指數高低波幅僅三百餘點，藍籌業績期過去，A股在三千點關口唔上唔落，外圍欠缺震撼消息，成就港股的拉鋸局面。自去年下半年香港樓市盛極而衰，豪宅紛紛劈價搶客，連津貼房屋都罕有出現滯銷，申請人自動棄權的情況，與去年中前，準業主爭先恐後，趕上資產升值尾班車的氣氛實有天淵之別。

近半年大行唱淡樓市，愈講愈誇張，野村報告預期明年第二季前，樓價將由高位跌去三成，大膽地假設，一旦人民幣顯著貶值及美國加息幅度夠大，在聯繫維持的大前提下，港樓最壞情況可以跌六成。

無疑要大眾留下深刻印象，語不驚人肯定是最佳辦法，樓市要跌六成的標題，無疑是十分「搶眼」，至少連古勝都因為咁，專登搵份報告睇睇。當然，大部分看官都只會對六成的預測留下印象，真係深究這來自南韓的日資行分析師，點解睇港樓睇到咁悲。

香港樓市不用太悲

報告提到，樓價跌六成的極端情況，要由人民幣一次過急挫三成，加埋兩年內美國加息四厘所觸發，先不論人民幣跌成咁，聯儲局仲有冇能力作出大幅度加息，將兩個極端因素推算得出一個更極端的結果，其實發生機會十分低，惟睇完標題卻信以為真，自己嚇自己驚餐死實在無必要。

香港樓市需求彈性特別大，投機取向的社會氛圍，升時個個驚死執輸，跌市個個準業主忍手，成交勁縮下乾跌，○九年就剛好示範過一次，之後因為全球量寬急速反彈。宏觀去看，全世界經濟差成為常態，撇除美國，受環球游資過盛及中國買家四出掃貨，推升的大城市樓價，好似倫敦、悉尼、溫哥華近月都仲屢創新高。

假如把港樓問題，歸咎於內地經濟走疲，那上海、深圳樓價與經濟背馳，不斷創新高，上海出動到史上最辣調控措施，港樓的獨弱就更難解釋，中長線去睇，在租金回報低下，供應開始增加，港樓理想投資時機已經過去，但美國加息空間有限，中國經濟增長逐漸見底，去年炒過龍的蚊型樓外，普通住宅樓價，今年未必有太大跌幅。

龍源電力換貨首選

市傳內地準備削減電動車補貼，早排汽車股唔理三七廿一，震過貓王。唔講唔知，政府大幅補貼下，去年中國已超越德、美、日等傳統環保車大國，成為全球電動車產量No.1，唔少左手交右手，實質呃補貼的情況出現，政府見情況嚴重，似乎都想為過度的補貼，打出一記修正球。

古勝唔止一次講過，在燒煤發電為主的角度，推廣電動車，不過將二氧化碳由車尾轉移到電廠煙囪排出，解決唔到污染，要根治始終要由能源產業主導，增加光伏及風能等真正潔淨的能源開始，近排龍源電力（00916）個勢唔錯，國策可能調整，換貨一於揀佢。

出口、投資及消費均是帶動經濟增長的動力，環球經濟唔好，對出口造成影響，外圍因素控制唔到。而現時中國面對經濟下行壓力，刺激內需不易，加上外遊人數上升，唔少消費力都流出國外，加大投資基建鐵路的可控程度相對較高。

國家鐵路局在今年初發布了《鐵路十三五發展規劃徵求意見稿》，鐵路固定資產投資規模將增加，達3.5萬億至3.8萬億元人仔，其中基本建設投資3萬億元人仔，新建鐵路長3萬公里。今年目標完成鐵路投資8,000億元人仔以上，對行業支持有增無減。

另外，「一帶一路」講明要同鄰國加強聯繫，高鐵要走出去，泛亞、中亞及歐亞高鐵線都係重點，隨着各方合作陸續落實，鐵路股定受惠，惟須留意項目變動，如去年墨西哥取消高鐵合作項目，以及上月泰國單方面宣布縮減中泰鐵路建設規模。

中車時代拓新產業

一眾鐵路股去年業績都唔失禮，中鐵建（01186）、中國中車（01766）、中國中鐵（00390）及中交建（01800）純利增長介乎7.8至13.2%，而中車時代電氣（03898）去年純利按年增長23.5%，賺29.6億元人仔，毛利率增至去年的39.1%。

中車時代主要經營活動為銷售及生產製造車載電氣系統及電氣元件，機車及動車牽引系統、城軌地鐵為集團主要業務領域。去年四月，集團收購了從事機械人和海底工程機械製造的英國SMD公司100%股權，發展新產業，加上有母企支持，訂單有望持續增加。

古勝