北水頭等倉：網龍雙線發展有錢景

唔知大家發唔發覺，騰訊（00700）股價唔聲唔聲經已上番160元，昨日曾高見162元，乃自去年六月下旬以來高位，收報161.8元，升1.76%，成交35億元。QQ在內地可謂無人不識，呢隻股肯定係內地基金南來的必購對象，估值幾貴都要買，更何況其現價估值並不昂貴。

北水重來升浪可期

若然冇估錯，班內地芬佬正在吸納騰訊，相信一個月內騰訊股價可突破高位171元，到時可以進一步確認北水重來，新升浪可期。各位宜密切留意呢個風向儀，以及早作出部署。

講到內地資訊科技股，昨日見到隻網龍（00777）亦有異動。網龍近年積極投放資源拓展在線教育產品相關設計及開發，並將教育產品組合擴展至虛擬現實領域。

事實上，去年十一月網龍完成收購Promethean World，標誌着公司正式啟動教育業務的全球擴張戰略。

此外，旗下遊戲業務持續發展，去年第四季新遊戲《英魂之刃》增長理想，加上今年將推出《英魂之刃》及《魔域》的新手機版本，今年遊戲業務有望成為推動公司轉盈的動力來源。

走勢方面，該股昨日曾高見23.25元，收報22.95元，升1.25元或5.76%，成交增至3,579萬元，短線有勢挑戰250日線23.5元。

喺記憶之中，今年內地互聯網股未大炒過，若然真係醞釀新升浪，一般都係龍頭股先行，故近期相關股份異動宜多關注，若板塊內二線股份亦相繼起動熱身，呢一波唔好錯過。

司慕渢