絲絲講場：齋App銀行敢用嗎？

靠把聲同個樣認證

呢間Atom同大家平日見開嗰啲「網上銀行理財」完全唔同，佢哋特別在零分行、所有銀行服務只經App做，開戶、交易乜都經App搞掂。Atom個App啱啱前日推出，用語音同面部生物識別技術嚟認證，個App仲可以個人自訂顏色與用戶名。個App暫時得iPhone同iPad用戶有得用，Android要等到五月底。

首個產品係定期存款，入場費需50鎊（約546港元），一年期年息2.2厘。聽講年底前會推埋往來戶口、活期存款、信用卡、轉帳卡、透支，連住宅按揭服務都搞埋。

估值16億 提款要靠人

行內似乎睇好呢種手機銀行（Mobile Banking）玩法，Atom舊年年尾已獲西班牙對外銀行注資4,500萬鎊（約4.9億港元），未開晒張估值達1.5億鎊（約16.3億港元）！CEO Mark Mullen亦大有來頭，之前係滙豐旗下嘅網上及電話銀行First Direct嘅CEO。

得個App，咁點投訴？Atom話打24小時服務熱線或Email，會有專人解答。點攞錢？現階段要靠另一間實體銀行過數，不過第時有往來戶口服務之後，就可以喺英國各大提款機提款。

香港法律與銀行體系皆源於英國，絲絲睇，香港要發展唔難，又睇吓點。

余絲韻