投資UWIN：巴打練「供」 做潮「樓」教主
據Demographia調查指，截至去年第三季，樓價中位數是港人每年收入中位數的十九倍，意味一個21歲大學畢業生，需要過十九年不吃不喝的「練仙」生活，到40歲才能做業主。不過，三位學界男神仍無有怕，堅持以買樓為目標，趁後生一齊惡補買樓知識及研究儲蓄大計。
以下三位學界男神都是商科生，同時身兼投資學會或財務學會幹事一職，對股票投資自然有深入了解。然而，他們對物業投資又認識幾多？就考考他們的置業知識，順便從男生角度出發，了解他們認為買樓是負擔，還是承擔？
申請公屋冀減開支
科大財務學會內務副主席 Justin
測試結果︰答對2題
Justin說︰「買樓係必須嘅，但除咗用嚟自住、投資之外，我覺得係一種身份象徵，代表工作尚算成功，有樓在手好似得到認同感。我希望30幾歲之前買到樓，知道好難買，因為根本唔知幾時先見到樓市泡沫，惟有靠自己努力賺錢同慳錢。依家我排緊公屋，到時畢業後有公屋在手，就可以節省住宿開支，又唔使靠屋企人。」
自住可以 投資則免
中大投資學會主席 Leo
測試結果︰答對2題
Leo說︰「如果要結婚，我覺得一定要有層樓，但如果唔結，就未必會買樓，樓只係滿足我嘅住屋需要，投資方面我唔會考慮。因為現時香港經濟增長下滑，同時樓市開始調整，未來十年我見唔到有咩動力令樓價再大幅飆升，買樓投資未必係最好嘅決定。依家未有為買樓做打算，等出嚟做嘢，會儲錢同埋投資股票，將資金滾大。」
買股勤兼職儲首期
科大財務學會市場推廣秘書 Nicholas
測試結果︰答對1題
Nicholas說︰「買磚頭係成年人必做嘅一件事，要有錢就要靠樓換樓賺第一桶金，買樓投資係累積財富嘅起步。不過，我依家仲讀緊書，未有太長遠嘅計劃，目標係40歲前儲到首期，所以要做多啲兼職，例如補習，同埋控制消費模式，應慳得慳，再靠買股票儲錢。同時，我唔贊成租樓住，因為租金不停交，但到頭來都係無層樓喺手。」
女仔Prefer「香車」定「香居」？
所謂「香車配美人」，擁有一部名車的男生容易吸引女生注意，但買車所需資金不少，分分鐘相等於買樓首期。
經濟曳 供樓難安樂
從女生角度出發，究竟她們愛的，是「香車」還是「香居」？男神要配名車，定係配住宅才叫有魅力？
恒管學生Stephanie認為，「買樓好過買車，因若果將來婚後仍要租樓，當加租嘅時候又要搵地方搬，實在太煩，最重要都係有安樂窩。雖有車好方便，但可以的士代步，但樓係代替唔到。除非未開始組織家庭或有多餘資金，否則樓一定重要過車。」
中大學生Yannie反而覺得有車好過有樓，「其實租樓住都唔錯，一來樓價太貴，唔係人人負擔到，加上經濟轉差，供樓都未必安樂，一旦無咗份工又要供樓就好辛苦。相反，有車出入就方便啲，依家香港車費都好貴，樓可以租，但車無得租。」