孖妹Ｓ檔案：業績期分獎+分析

熊：友達資產管理董事 熊麗萍

P：全職炒家 Pasu

潘：阿仕特朗資本管理首席投資總監 潘鐵珊

最嚇人：百麗（01880）：隨時叮走 唔好掂住

熊：佢原本係大藍籌嚟，仲係基金愛股添，女裝鞋市場佔有率高，以往估值一向都貴，股價由高位跌落嚟，同估值貴有關係。不過，現時估值已經跌到好低，近期仲出咗盈警，投資者會着眼於佢盈利倒退後，前景又會係點……今次業績差，主因同店銷售增長放緩、受其所收購品牌嘅商譽減值而進行撥備影響，加上開新店亦增加成本開支等，呢啲因素喺未來一年可否解決就視乎銷售情況。

其實女裝鞋行業競爭好大，佢亦有做體育鞋履品牌，但業務佔比仍小，只用體育鞋履同人比又唔得，本業又改善需時，所以冇咁快可以轉勢。佢有機會被踢出藍籌行列，不過唔係短期內會發生，因為業務上係指數成分股中所欠缺嘅，所以仲有存在價值，除非股價再急跌啦！雖然佢依家係好平，不過都係唔好掂住喇，要睇今年上半年業績先再作部署。

孖妹：不過，百麗旗下品牌，好似Joy & Peace、Jipi Japa等嘅女裝鞋唔止唔嚇人，仲好時尚添，希望佢快啲搞番好盤生意啦。

藍籌去年業績有喜有悲

友達 熊麗萍

最息冧股東：交通銀行（03328）：利字當頭 調整再諗

熊：業績只係有1%增長，唔算好，但佢維持三成派息比率，由於佢係四大行以外一家較大規模嘅內銀股，故曾帶動內銀板塊做好。之前市場憂慮內銀會縮減派息比率，間接令股息率下跌，但現時若果內銀股可以保持三成派息比率嘅話，平均嚟講股息率都可以Keep住有6厘，消息令投資者消除咗派息減低嘅憂慮，現時持有內銀股人士放心咗。即使業績增長一般，因應部分內銀都只係輕微下調派息比率，仍保持三成水平，意味息率仲係吸引，持貨者繼續持有。

全職炒家Pasu表示，未來可能會做中海油淡倉。

阿仕特朗潘鐵珊表示，利豐業務放緩情況難以扭轉。

交通銀行雖然股息率唔錯，但本業前景唔樂觀，盈利增長極慢，加上中國經濟增長放緩，喺業務同壞帳方面都存在拖累，內地正推動消費信貸，對該行而言都有啲幫助，但力度唔大，整體內銀與內地經濟增長相關度大，而且近期股價已跟隨大市抽升，現行水平唔建議吸納，應等佢調整一成以上再作部署。

孖妹：內銀暴利年代可能真係一去不復返……有啲唏噓添。

最離地：中海油（00883）：盤數靚仔 暗藏問題

P：中海油份業績話舊年實現油價51.27美元一桶，同依家市場價比較真係好離地！雖然油價已由低位回升，但若然佢想今年實現油價同舊年水平持平，因應今年第一季油價只得三、四十美元，粗略計算，油價要回升到79至80美元先得，但可能性極低。仲有，佢收到政府稅務回饋之後，令佢成盤數靚仔咗，所以業績唔太反映到佢面對嘅問題。

另外，相對佢一五年業績同埋油價下跌幅度，股價跌得太少，現時市盈率16倍，如果冇稅務回饋嘅話，市盈率就會飆到上30倍樓上，佢一六年預測市盈率有成二百倍，唔值博。顧及公司於海洋開採石油成本高，一旦油價重上40至50美元樓上，美國頁岩氣公司會開機生產，到時油價就難企穩，佢生意就更難做。中海油近期股價彈只因技術性平淡倉咋，未來我或會等好機會做淡倉。

孖妹：究竟油價仲平過桶雞餐嘅日子仲要Keep幾耐？

最誤導：港交所（00388）：市盈率貴 伺機沽空

P：港交所賺錢與否取決於市況，一五年港股出現大時代，令到成交大增，平均每日成交額有1,056億元，今年可能平均只得700億元左右。其實上年只不過係受政策刺激先有咁嘅成交額，估計今年政府會傾向審慎，投資者亦會傾向理智，所以即使係推出咗深港通都好，亦都唔會係滬港通後市況嘅翻版，頂多彈一、兩日。

現時港交所市盈率27倍，由於今年冇咗大時代，而且旗下LME受累商品走勢低迷，一六年預測市盈率去到三十幾倍，可見一啲都唔平，若然佢回升至200元水平，應該係沽空嘅理想時機。

孖妹：我哋相信醒目嘅投資者唔會被誤導嘅。

最吸睛：騰訊（00700）：爆炸力強 買貨等$155

潘：騰訊係業績比較突出嘅一隻，佢連續幾年都處於高增長期，喺電商股中有代表性，喺手遊、雲端、電商及廣告業務仲有好大發展空間，未來喺金融平台，例如券商、銀行、保險及信貸公司都會有唔少合作機會。隨住電商發展成熟，佢喺行業中擁有優勢。

騰訊舊年賺288億元人民幣，手遊業務突出，增長53%，廣告收入仲升咗1.1倍添，呢兩瓣未來仍會處於高增長期，來年可以帶動整體業績。佢預測市盈率約30倍，現水平於績後累升不少，建議回落至155元附近吸納。

孖妹：肥嘟嘟嘅企鵝仔都仲係咁得人鍾意。

最有潛力：長江基建（01038）：頻繁拓展 催升股價

潘：長建多年嚟透過不斷併購嘅策略，於歐洲、英國擁有眾多公用事業，雖然歐洲經濟尚未恢復元氣，但處於負利率環境，喺未來三至五年，經濟可以有更大發展。留意到公司業績過去表現理想，雖然呢次業績純利按年減少65%，但撇除一次性收益，純利按年增長12%，所以增長都算平穩，預計情況可以持續。

長江基建喺今年六月或會與電能（00006）再提合併方案，若成事會有協同效應，長建未來喺歐洲存在新收購計劃，相信可以開拓更多新盈利來源，建議可以喺近期低位74元附近開始吸納，目標睇一年高位約81元。

孖妹：咁就要金睛火眼盯到實，伺機入市喇。

最黯淡前景：利豐（00494）：利潤收窄 挑戰嚴峻

潘：佢目前要面對嘅問題嚴峻，因為利潤持續下跌，一六年更加係受挑戰嘅一年，可見業務上放緩情況難以扭轉。雖然該公司現時致力推行長線項目，又喺產品垂直及多渠道採購方面落工夫，但行業競爭巨大，邊際利潤持續收窄。

另一方面，該公司中介人角色持續被淡化，隨住歐美經濟未見明顯起色，近期美國聯儲局主席耶倫又「放鴿」，可見美國經濟未有咁快好得番，所以如果想揀利豐，不如揀終端工業股好過。

孖妹：唉，我哋有姊妹高位入咗貨，真係一殼眼淚。

若有料報畀彩兒同Kitty或有嘢問，可電郵money.biz@on.cc

彩兒 Kitty