Market Insight：內地航空股要識揀擇

無疑上周四的本地零售數據以及標普低中港主權評級，都為港股吹起陣陣淡風，周五朝早港股高開9點後，沽家老實不客氣，沽盤浸浸落，全日指數愈跌愈深。

全周埋單計，恒指累積升幅收窄到153點，周五有近千隻股份見紅，多少見到長假期前大戶落雨收柴的手影。

舊年A股股災後，阿爺全力托市，結果一線城市樓價坐咗火箭，終於上海率先推出被譽為史上最嚴的調控辣招，以高首期大幅提升準買家入市門檻。二月中開始一輪衝鋒的內房股，升勢開始「立立哋」，到底辣招對上海樓市冷卻作用有幾大？睇怕都要睇多一陣先見效果。

網龍增長故事吸引

上周派成績表的網龍（00777），由前年賺1.77億元人仔變為蝕1.43億元人仔，每股虧損28.85分，周五股價微跌1.3%收報22.1元。業績表面是盈轉虧，但從騰訊（00700）業績帶來的啟示，顯然依家中字派缺乏增長故事，P&L（盈虧）與業務能否保持增長，兩者之間大戶明顯是睇重後者多點。

網龍這方面表現其實唔錯，撇除收購英國網上教育生意普羅米休斯，舊有業務（主要是網上遊戲）第四季收入按年升22%，兩個主打遊戲《英魂之刃》及《魔域口袋版》帶動，第四季的遊戲用戶每月人均消費升幅接近兩成三。

雖然新收購只有一季趕及入帳，網龍網上教育收入已從一四年3,283萬元人仔，大升6.3倍至2.42億元人仔，全年業績的虧損基本上都來自新教育業務普羅米休斯的推廣前期開支，收購後，教育業務佔網龍整體收入比重，由一四年的3.4%升至19.1%，可以推斷，全年入帳的話，手遊與教育應可平分秋色，各佔收入一半。

近一季營造圓底走勢，在17.4至21元打好底，近排幾隻出名又未上市內地網股，在私募基金市場叫價愈來愈高，對比下網龍營收表現更佳，估值也合理，如果回到21至22元之間可以再入。

國航（00753）、南航（01055）及東航（00670）上月尾公布業績，成績表都幾亮麗。當中表現最好係南航，舊年賺37.36億元人仔，大升1.1倍，其次係國航，賺70.63億元人仔，升83.3%，東航就賺45.37億元人仔，增加33%。

客運需求持續暢旺

燃料成本一向係航空股最大的營運成本，去年國際油價持續下跌，令各航企的燃料成本平均下降三成，對於盈利實有正面作用。不過，隱憂仍然存在，人仔貶值對美元負債比例較高的航企而言，有一定殺傷力，或會抵銷油價下跌的利好因素，況且油價已有止跌回穩迹象，今年燃料成本隨時又升番。

中國出境遊持續增長已成趨勢，客運市場需求應該會保持增長，但同時，環球經濟未見有明顯復甦，貨運市場低迷情況短期內都好難改變，能唔能夠拉上補下，就要睇各航企的策略。

上海迪士尼六月正式開幕，始終係內地第一個迪士尼樂園，上月預售一開始，首日門票喺幾分鐘之內就售罄，由預訂情況大概都知樂園有一定吸引力，可以帶動去上海的遊客人數，東航應可受惠，短期可以留意吓。

古勝