Market Insight：合生元新業務看俏

傍晚港府公布本地二月份零售總銷貨值，連續十二個月插水。二月撞正新正頭，零售業總銷貨值臨時估計370億元，按年大瀉20.6%，比街外估緊的單位數跌幅差一大截。對比一月經修訂後銷貨值跌6.6%，首兩個月合計的數字跌幅擴大到13.6%，都咪話唔得人驚。睇細分數字，珠寶首飾、鐘錶及名貴禮物的銷貨值跌得最甘，達24.2%；其次是服裝跌11.4%，百貨貨品及藥物、化妝品跌12.3%及7.7%。

即使唔睇數字，用對腳出去油尖旺走走，通街吉舖，多少感受零售業寒風刺骨的現實。內地客奢華不再，一來以往來港掃金飾同手錶的豪客，都識得轉去歐洲、日本，貪匯水平連埋機票都除笨有精。

至於依然來港的一批，消費模式亦今時唔同往日，內地經濟固然唔好，港匯跟住美元相對偏強既成事實，零售業界再套用以往開多幾個個人遊城市落嚟逼爆旺角，就解決問題的思維已經行唔通。

A股內在因素關鍵

況且今次情況咁難搞，在於股市樓市好景時，香港固然有條件大魚大肉，惟舊年股災輸死人外，多年樓市泡沫亦有轉角氣氛，業主們自我感覺良好日子不再，一旦財富萎縮成為趨勢，零售業不景氣，只怕會由奢侈品擴散到其他衣食住行的日常範疇。

繼穆迪後，昨日輪到標普下調中國評級到AA-，評級展望由穩定降至負面，消息一出傍晚A50場外期貨曾經急插。正所謂一件污兩件穢，三月初畀穆迪降級至今，滬綜指升咗5.4%。個個都知內地經濟放緩，反而大媽在近日證金公司降孖展息同埋配資死灰復燃下，方是後市關鍵，滬綜指守住3,000點附近，古勝傾向相信短期爆上機會率應高於五成。

基金季結日，港股昨擺出唔肯跌姿態，恒指首季最終完成V形走勢，由最多累積跌3,636點或16.6%，收窄到跌1,138點或5.2%。展望第二季，港股是龍是蛇仍繫於阿爺聲嘶力竭，甚至半打茅波地托市，A股似醞釀新一輪反彈。加埋聯儲局不斷搵藉口暫緩加息，後市睇嚟唔需要過分悲觀。

內銀削息損吸引力

不過，重磅股要配合爆升，睇怕可以睇少內銀一瓣。近排內銀股業績遲一遲至曝光，本來中國經濟增長仲走緊下坡，不良貸款周期未見頂乃意料中事。事實上，內銀靠債股置換，在會計政策上讓大型企業以息養債，整色整水，講到底係要維持輝煌的營收帳，反而，近日陸續減派息成風，對股份的殺傷力有待觀察。

事實上，大孖沙「短中國」成為大氣候，仲肯坐內銀股的，唔少都係長線投資，或者出於高息，多於對中國經濟考量，內銀股依家閒閒哋6、7厘息，同企業債及國債息差夠闊，至吸引到好息之徒，一旦派送比率持續下調，高息吸引力定必打折扣。昨日農行（01288）業績微升，派息卻減8.3%，即仲有7厘，未必觸發好大沽盤，但減息趨勢下，要吸引新錢落疊亦唔容易，睇怕內銀都好難會成為後市上升的領頭羊。

水向低流，大落後的乳業股昨日普遍飛天，獨漏低隻合生元（01112），埋單倒跌1%收報28.5元。去年十一月發盈警，預告業績少賺九成，早兩日成績表曝光，僅跌69%賺2.51億元人仔，但涉及收購成人保健品牌Swisse Wellness的匯兌收益及其他一次收入變動，實在不宜單看數字，認定業績超額完成。

轉型保健品有出路

從業績報告中，看來嬰兒奶粉的經營比預期困難，至少未見復甦先兆，全年收入減少15.7%，比上半年8.7%進一步擴大，反而Swisse的貢獻比預期多，一季入帳提供8.49億元人仔收入，相當於合生元整體收入48.1億元人仔的17.6%，或者嬰兒奶粉全年收入33.5億元人仔的25.3%。

按此趨勢，合理推斷一六年的全年業績，保健品有機會超越或至少與奶粉業務平分秋色，管理層向分析員透露，保健品毛利率高，應可解釋到去年底出完盈警之後，股價見底後累積勁彈1.2倍，是感受春江水暖的大孖沙行動，暫時睇，涉及77億元的收購可謂對辦，但基於累積升幅過大，睇好由鬥生鬥死的奶粉轉型保健品的，應可等回吐再算。

古勝