絲絲講場：愚人節贈你15招職場醒晒

一個人生出嚟醒目，可能關基因事、關成長環境事、關阿爸阿媽事……但至於一個人望落醒目與否，就關曉唔曉呢15招事，15招全部來自外國大學研究，有晒數據支持，堅得。

話時話，Send呢15招畀絲絲嗰位，唔通係叫絲絲唔該醒少少……

1. 學做四眼仔

戴番副眼鏡，無論係有框定無框，維也納大學研究話雖然無咁靚，但啲人會覺得你醒咗。你想靚啲定醒啲？

2. 步速跟大圍

行得快好世界？錯。波士頓大學研究指出，步速太快或太慢，原來畀人覺得蠢；步速同周圍其他人差唔多，畀人感覺係有智慧啲能幹啲。

3. 形象靠衣裝

研究話，着得Formal啲（正規啲）嘅大學助教，雖然無咁型，但學生覺得佢哋有智慧過啲着得Casual到同啲學生一樣嗰啲。仲有，着醫生或實驗室白袍嘅，畀人覺得權威啲。

4. 咪揸住杯酒

就算只係個啤酒杯都唔得，事關人哋會聯想起你飲醉個樣，無論實情你幾飲得，都扣印象分。

5. 棄鼻環唇環

想令人覺得你高智商，唔該即刻除晒佢，研究話鼻環唇環愈多愈累事。

6. 望住人講嘢

咁唔單止留個好印象畀對方，人哋仲覺得你IQ高。話時話，呢樣乜唔係基本禮貌咩？

7. 多啲用圖表

若可用圖表解釋嘅，盡用，事關望落科學啲、有說服力啲。財圈中人點解成日同圖表做朋友？明晒。

8. 講嘢要有Tone

講快些少、大聲啲啲、停頓少啲、聲量有啲變化，要抑揚頓挫，聽落唔好Monotone咁悶，即刻有料咗。嗱，唔係朗誦，咪過龍。

9. 講吓笑搞Gag

原來咁係高智生物嘅表現，女人尤其係咁睇男人，心理學研究話嘅。

10. 撻個自信樣

研究話，比起嚴肅樣，自信樣望落能力高啲。

11. 記住笑笑口

板起塊面Cool啲=高智慧啲？No喎，研究話，原來啲人覺得微笑多啲，先係高智慧嘅面口。

12. 寫嘢簡而精

唔好用深字，唔好用長句子。愈拋書包愈見蠢，睇吓啲金句王，你懂的。

13. 做大佬阿姐

有領導才能雖則唔代表包有智慧，但人普遍覺得做大佬阿姐，IQ係高啲。

14. 咪唔識扮識

唔識就要認，虛心先係致「醒」之道。

15. 簡寫中間名

呢招就算未必用得着，學埋都無壞。股神巴菲特全名Warren Edward Buffett，若然寫做Warren E. Buffett，即刻型咗。

余絲韻