Dennis在訪問的過程中提過幾次創業的「過癮」心情，「你問我，做Start-up辛唔辛苦？做ShowMuse辛唔辛苦？我可以話係好辛苦，不過我覺得好過癮！」「我有時煩到唔隊酒瞓唔着，不過又真係好過癮！」他更指自己是被虐狂，「人有惰性，所以我好鍾意投資者定啲高難度嘅目標畀我哋！有佢鞭策我哋，我哋無得懶。」要創業，就是要跟時間競賽。
經歷過人生的低潮，Dennis的心理質素非常高。「我好相信，只要你過到人生嘅最低潮，下一個迎接你嘅就係人生嘅最高潮！如果低潮係負十，高潮就必定係正十！」他經營ShowMuse，最沮喪時，他會跟自己說，「好彩我之前面對過癌症，如果唔係，都唔知點過。」他更指，「我呢啲壓力同血科醫生比，又算得係咩？人哋面對住人嘅生死，我面對緊係個Apps啫，係叫啲老師掟啲課堂短片上嚟啫。」
Dennis的創業經驗比其他年輕創業家多，ShowMuse是他開創的第三間公司。他曾開設廣告公司，「頭半年好慘，一單Job都無，而幾時有？唔知，望唔到公司嘅前景。我淨係識戇居居咁守落去！」幸好當時堅持住，其後接二連三地接到工作，收入已經是以前半年的薪酬。
「唔輸得」的性格是過去創業的成功之道。他憶述開辦廣告公司時，「由零做起，人哋點會信你，好難攞生意！所以我試過同個客講，你唔使同我簽約，我出錢做，證明畀佢睇我哋係掂。收本地嘅價錢，做到4A質素嘅嘢。」他笑指，當客人不好意思，多次免費拿你的創意自用，他們便會記得你，有需要就會找你。就此，他成功與第一家國際著名公司合作，自此客源不斷增加。