絲絲講場：喬布斯師傅羅戈夫離世

曾掌英特爾40年

連已故Apple教主喬布斯都奉佢為師傅，絕對係神級科技巨人。佢嘅影響點止科技界，佢本書《Only The Paranoid Survive》更加係好多商界領袖偷師必睇嘅管理學聖經。

羅戈夫係生於匈牙利嘅猶太人，童年逃過納粹魔掌，輾轉初到美國尋夢時，身上得廿蚊美金唔夠，要由紐約親戚接濟，但佢勤奮好學，仲自學英文，博士畢業後加入Fairchild Semiconductor，從此同半導體業結下不解之緣。

羅戈夫號稱係英特爾第一位員工（其實佢係創辦人之一），公司喺佢掌舵40年間，最經典一役係80年代帶領英特爾轉型主攻電腦微型處理器，與微軟一齊雄霸個人電腦市場，成為家傳戶曉品牌，佢仲喺九七年登上《時代》風雲人物。

佢逝世消息一出，科技界名人紛紛喺Twitter悼念。微軟創辦人蓋茨話羅戈夫係20世紀最偉大嘅商界領袖之一，佢嘅離去係電腦行業一大損失；Netscape創辦人Marc Andreessen（安德雷森） 就話羅戈夫係硅谷最出色嘅企業家，相信後無來者。

余絲韻