絲絲講場：恒安業績會交棒演習？

「想其他管理層鍛煉吓」

尋日，公司大股東、副主席兼CEO許連捷就罕有無上台主持業績會，反而佢位公子、公司執董兼供應鏈總監許清池就首次「被擺上台」列席。

不過許連捷話，自己舊年都試過唔上台主持業績會，佢話今次想其他管理層「鍛煉吓」，又強調自己唔係退休。對於阿仔許清池首次台上表現滿唔滿意呢？佢就唔多想講。問番阿仔許清池係咪老竇讓「位」畀佢呢？阿仔即刻耍手兼擰頭。

喺尋日個會上，明顯由許連捷堂弟、恒安執行總裁兼首席營運總監許水深擔大旗。許連捷自己就全程台下專注於手機螢光幕。純粹睇手機？定有無遙遠向台上管理層即時教路答問題呢可？

查實許水深早被外界視為公司接班靈魂人物，佢尋日猛話公司仍好需要許連捷。講開接班，梗要問埋創辦股東之一、逾65歲主席施文博有無諗退休，佢就話無諗。

余絲韻