北水頭等倉：中國信達挑戰阻力

滬綜指昨日衝上2,900點樓上收市，有說係外資入場抄底，因為滬港通流入資金增至20億元人民幣。

市傳深圳創業板優質股將獲納入深港通標的股，消息刺激深創板昨日做好，伴隨的消息是話第三季港股將推行市場波動調節機制及收市競價交易時段，好明顯係要同內地制度睇齊，迎接同胞們進場有關。雖則話，如今魚缸交投已唔多，搞埋個市調機制，班Day Trade炒家可以冚旗。

市調機制福禍難料

但要知道，若然深港通入場門檻下降，加埋標的股都係風險較高的中小股，真係多咗班土豪同胞來攪亂檔，市調機制其實係保障班本地玩家。至於話收市競價時段，聽講改革過後的新機制會增設限價及隨機兩大元素來防止股價波動，觀望成效再下判語亦未遲。

全球股市風險暫緩，內地金融股氣氛改善，昨A股升市內銀功不可歿。早前提及的中金（03908）昨衝穿11元關，走勢對辦。此外，留意到中國信達（01359）昨日升3.47%，收報2.68元，成交1.94億元。不過，屬同一板塊的中國華融（02799）則未見異動，收報2.94元，跌0.3%。

內地經濟不景氣，理論上內銀處置不良資產的需求增加，除了透過出售予不良資產管公司之外，有指當局正積極研究不良資產證券化，「債轉股」係其中一個說法。

反正唔使全部依靠不良資產管理公司處理，對後者唔係壞事。回說中國信達股價，今年首季股價呈圓底回升，本月中旬10日線升穿50日線，走勢明顯改善，若能以大成交突破3元阻力位，下一個較大的阻力位在250日線3.4元水平。