Market Insight：汽車股低撈博反彈

耶倫示範乜嘢叫做口硬手軟，雖然死撐唔排除四月加息可能，可是從聯儲官員年終利率預測可見，中位數落到0.875厘，意味今年至多兩次各四分一厘的加息空間，比舊年底估一六年加四次，各一個骨縮咗一半。美國以外全球經濟集體失速，歐日出動到負利率依然未見起色，形勢比人強，短期美國就算加唔到，耶倫似乎都唔想咁快閂後門，予人棄甲曳兵的感覺。

值得留意，聲明同耶倫記者會上答問，都提到全球經濟比預期差的風險，確認聯儲局不敢於息口問題上面自己顧自己，單睇實就業數據同通脹，就輕舉妄動加息。

議息後，聯邦基金利率期貨反映四月加息可能性，由27%跌到7%，十年期美債孳息由即市貼近2厘殺到落1.86厘，美匯指數落到95邊，返回舊年十月中旬水平，同美元賭相反方向的黃金、外匯統統向北，是月初就業數據爆燈，加息預期重燃以來的市場共識大逆轉。

華晨有望追落後

兩會完結後，汽車股是少數未見炒家鳥獸散板塊，昨日比亞迪（01211）及吉利汽車（00175）走勢唔錯，短期有再突破機會。較受爭議反而是華晨（01114），隔晚德國寶馬派成績表，預示在華合營項目淨利潤跌34%至73億元人仔，由於華晨自主品牌表現差強人意，近年合營的華晨寶馬幾乎佔去業績大部分，被視作業績前瞻。

一五年A股股災，中國消費市道麻麻直接拖累到車市，且近年中央政府扶持低排汽車市場，削減1600C.C.以下車稅，華晨主打的中型房車又無乜着數，故股價一直跑輸其他主攻低排的車股，業績倒退就預咗，最終只係跌得多定少，由昨日股價抽升7.6%，貼近day high收7.04元，可見合營項目成績即使要跌，但已經無市場估計般差。

美銀美林話其一五年業績最終比街外預測高4至9%，最重要係EBIT毛利率比預期穩定，估計一五至一七年的複合盈利年增長可以維持18%，目標價11.99元，較昨日出報告睇淡些少的瑞信及德銀的7.2元及9元的目標價高。

中移績後有沽壓

睇番股價與舊年同期比，唔見一半有多，比其他車股弱，去年底唔少大孖沙披露增持名單有佢，均貼近10元邊入，純粹貪比大孖沙買得平，有得博下反彈。

三大中資電訊股已有兩隻派成績表，中國聯通（00762）去年純利達105億元（人仔‧下同），按年跌12.4%，惟表現較市場預期理想，所以股價昨日一度突破10元關口，最後以9.98元收市，升9.07%。至於中移（00941）去年股東應佔利潤為1,085億元，按年下降0.6%，惟表現遜預期，所以績後有沽壓，逆市跌2.08%報84.55元。

內地電訊股目前仍然處於艱難時期，政策方面受到提速降費、營改增流量月費等影響，而4G市場競爭激烈，亦對電訊商的ARPU構成影響。中移今年首兩個月4G上客量達4,800萬，已超出預期，而集團由於在4G方面有較大優勢，因此今年底預計4G客戶數目可達5億。但市場關注的是4G的ARPU下跌幅度，若ARPU跌幅大於預期，相信會對中移股價構成壓力。

聯通去年十二月至今年二月，移動服務收入已大致持平，加上集團加強控制支本開支，相信有助其改善現金流，盈利能否進一步改善則仍有待觀察。

騰訊短線料向下

收市後，騰訊（00700）公布去年賺288億元，升21%，初步睇，視訊與推廣業務成本高於預期，亦係業績差過大行估計主因，第四季賺71.6億元，大約比預測少4%。昨日騰訊無跟個市破頂，在周一高位153.5元頂到實，唔係無的放矢。

同聯通一類無期望，無失望股票，結果有意外驚喜好唔同，騰訊市盈率42倍，係藍籌股平均PE三倍多，高估值交唔出高增長的殺傷力，肯定比低PE股更大，短期返落去144至150元搵支持，應無懸念。