北水頭等倉：碧桂園或回試支持
兩會曲終人散，繼中證監新任主席劉士余話深港通年內開通，總理李克強再次重申力爭今年開通。市場估計「通車」時間會在下半年，是否意味此前兩地股市會繼續反覆上落冇大方向？如此則次季缸邊友要繼續首要保留實力，短炒波幅小注怡情，等下半年再睇下有冇機會食大茶飯。
過埋呢個季結，四月頭可能都要回回氣，等四月中下旬公布的經濟數據靚仔番啲，先至再次發力。睇番業績股，碧桂園（02007）去年度少賺9%，基本上在市場預期之內，但績後多家投行調低其評級或目標價，主要是見到公司毛利率收窄，增加發債令融資成本增加，以及每股股息下跌等。
事實上，公司舉債但未有落實收購，利息白付，負債比率升高，加上集中發展低端城市，這些因素均不利估值，基金手起刀落不無原因。
碧桂園股價由周初高位3.52元，回落至昨日低位僅2.99元，若短線能迅速重上250日線3.15元樓上，則跌勢有望喘定；但若然未能收復失地，則有機會再試去年十月以來的重要支持2.8元水平，再覓方向。
司慕渢