Market Insight：手機設備股有優勢

其實美國原油庫存一路仍創歷史新高，加上凍產未有實質進展，油價的升勢主要由補倉冚倉盤推動，一到40美元相信大把投資者等住重新沽貨，依家上到39美元有先頭沽隊亦屬正路。恒指未能一鼓作氣再試高位，散戶傾向等埋議息結果，成交縮回565億元。

周三晚是一個分水嶺，由之前對加息安枕無憂，會否轉變態度，開始驚六月加息？只為耶倫女士的幾句說話。當然，耶倫亦不會明確表態，但美股再升至今年新高，而加息機會不再是「零」，將令後市縱有升幅亦會有限。

滬綜維穩隨時結束

滬綜指有理冇理又尾市反敗為勝，又係靠銀行股護盤，冇嘢好講！人大今日就閉幕，原本寄予很大期望的去庫存和去產能冇乜實質政策出台，但去庫存可能礙於近期大城市樓價升勢而無謂再潑火；總之，今次兩會期間股市表現維穩味道更重，特別之處是油價升、人仔升、樓價升，全部都係反地心吸力，至於經濟數據差已不甚敏感，但地心吸力遲早發揮作用。

一批中型股先後公布業績，包括舜宇光學（02382）、信義玻璃（00868）、信義光能（00968）、特步（01368）及阜豐（00546）等，只得舜宇一隻升，而且升到幾乎創新高咁誇張，信能及阜豐則跌7%，市值716億元的碧桂園（02007）更大幅回吐9%之多。無論業績好醜，大部分公司派成績表之日亦係走鬼之時，尤其信能及碧桂園已累積頗大升幅，更添回吐壓力。

不過，點解舜宇會顯得一枝獨秀呢？手機鏡頭及車載鏡頭銷量好係人都知，關鍵可能在毛利率。集團全年毛利率16.5%，按年升1.2個百分點，亦高於上半年15.5%，而主要產品光學零件業務的毛利率亦升至35.1%（一四年26.7%，一五上半年32.5%）。

毛利率對手機設備股相當重要，手機品牌商價格競爭愈趨激烈，所以同時向設備供應商壓價；設備供應商不斷推出新產品和高端產品，但能保住毛利率不跌已算萬幸，瑞聲科技（02018）每季業績最影響股價的亦是毛利率升跌。

舜宇可候調整吸納

iPhone和三星均標榜旗艦手機的攝影功能是「大師級」，其他手機品牌亦要「落本」提升鏡頭各項功能，所以舜宇在手機設備股當中享有特別優勢。

可惜的是，緊貼手機設備股業務表現的最佳途徑是睇大行報告，大行方能掌握一手消息及資料。在公布業績後，麥格理將舜宇目標價由28元升至32元，現價距目標價仍有65%的上升空間！

之但係，舜宇一五年PE接近23倍，可媲美龍頭科技股及醫藥股，是否能「坐2望3」的確好有疑問。姑勿論如何，舜宇股價剛突破19元附近之四頂阻力，大行近期相信將陸續大送高帽，走勢應有餘未盡。

舜宇去年度盈利升34%，但業績前未有發盈喜，所以給予股東一個驚喜。信義光能早發盈喜，何故會見光死？信能今個月股價由2.2元低位反彈上2.8元，有回吐亦不稀奇，管理層對今年前景仍表樂觀，光伏玻璃價格今年首季上升一成，天然氣成本比去年下降，另發電站陸續提供盈利貢獻，待其回落可吼。

小注巨騰博再跑出

阜豐由去年五月高位累跌超過一半，去年上半年賺4.14億元人仔，但下半年僅賺1億元人仔。其實又不算大失所望，過去幾年業績急升，皆因黃原膠可用於生產頁岩氣而需求激增，去年油氣價格疲弱，黃原膠價格亦急跌；單睇下半年盈利，股價亦恐怕未見底。

若論上、下半年的反差，巨騰國際（03336）則是另一個對比，上半年賺3.54億元，下半年賺5.2億元。公司主要產品係手提電腦外殼，屬於走下坡行業，故此有爆冷味道。據分析，金屬外殼提高毛利率、二合一（手提+平板）電腦訂單及人仔貶值成三大利好因素，一五年PE得4.4倍，去年中期業績後由終極低位累升六成多，今次會否再創奇迹？因具值博率，定好止蝕位小注冷敲無妨。

古勝