絲絲講場：品牌代言人形象插水 買「羞家保險」有錢賠
睇見俄羅斯網球天后舒拉寶娃被指服用禁藥，陰功豬，絲絲係講啲贊助商。
代言人形象插水，Nike、Porsche同TAG Heuer就算劃清界線，都只係斬纜止蝕。想無咁傷？若贊助商有買Disgrace Insurance（似乎香港未係咁興，絲絲姑且叫住「羞家保險」）嘅話，會定啲。乜嚟？即係代言品牌怕被醜聞拖累而投保，減低損失。
投保人激增三成
多得近年社交媒體興起，名人有咩醜事立即傳通街。所以呢種「羞家保險」，呢三年投保人多咗30%，令全球最大保險市場Lloyd's of London嘅意外保險總額推至55億港元。
點保法？保單可按品牌對代言人嘅信心度身訂造，保費一般不多於投保額1%，保障範圍除咗醜聞對品牌造成嘅收入損失外，仲可以包埋當倒咗落海嘅廣告支出。
余絲韻