絲絲講場：做80後企業家多新條件

邏輯上，做生意至重視係講賺幾多錢，但80後似乎唔係咁睇。滙豐私人銀行舊年做咗個調查，發現依家嗰班香港80後企業家極重視嘅係「社會責任」、「社會及文化價值」咁。你自覺係80後企業家？睇睇有冇以下啲條件先講。

冀為經濟作貢獻

首先至少有一間公司，兼個人身家最低限度近200萬元，個調查先當你係「企業家」。

至於入唔入到流？嗱，有78%嘅香港80後企業家覺得，做生意係希望為經濟作出貢獻。OK，呢樣都係講到錢，好易理解。不過，有近七成話做生意要考慮正面影響社區，仲有七成過去一年積極參與慈善活動，當中仲有好多認為「施比受更有福」添。

難做過上一代

再有難度啲應該係呢樣，就係有近一半香港80後企業家認為，自己所做嘅係反映社會及文化價值，而非個人價值。調查仲見到，佢哋當中女性佔咗55%，佢哋媽咪嗰代（55歲以上）嘅女企業家只佔33%。換言之到呢代終於見到平等。

香港80後做企業家，唔止講賺錢，仲要講對社會出心，仲唔係難過佢哋阿爸阿媽嗰代！

余絲韻