孖妹S檔案：神級炒功書中尋
孖妹一心以為港股跌咗咁多，係時候嚟個反彈，點知次次升穿兩萬點冇耐就回落，不過原來唔少財經作家喺淡市都冇停手，密密寫書為散戶指點迷津。孖妹炒股炒到冇晒心機，又多咗好多空閒時間，梗係要搵呢班專家精進吓炒藝，睇吓點樣趨吉避凶啦。
玩細價股要識走位
聶：Homeblogger細價股課程導師 聶振邦（聶Sir）
彩兒：作家嚟講你都好多產喎，今年已出咗兩本書，一本講小資族點樣創富，一本就講炒細價股嘅攻略。
Kitty：個市咁淡，啲散戶仲會有興趣學炒細價股嘅咩？
聶：唔同時間有唔同炒法嘅，市旺可能炒多啲收購合併消息；市差可以盡量搵啲貨源歸邊嘅股份，例如啱啱上市嘅新股，另外就係供乾咗嘅股份，即係供股嘅股份集中咗喺一小撮人手上，又或者股價低迷時，配股配番畀管理層或大股東嘅公司。
彩兒：啲細價股可以短短一日就暴瀉幾成，今年都有唔少呢啲例子啦，點解你又會咁搏去炒呢類股份呢？
聶：我最初係做基本分析，跟巴菲特嗰套價值投資，但之後見好多公司做假數，同美國唔同，香港嘅價值型股份愈來愈少，令我覺得研究公司財技可能係新嘅投資出路，所以五、六年前開始睇啲細價股。
刨通告兼訂目標價
Kitty：咁佢哋嘅升幅又真係好吸引嘅。你有冇一招半式教吓我哋點樣唔會炒到血本無歸？
聶：我每晚會去港交所網站睇晒嗰日嘅公司通告，分供股、配股、發可換股債券、認股證等類別去睇。如果隻股出咗公告第二日即刻升，追入會危險，唔即刻升而買入反而較安全。
另外，散戶要去研究大股東買入股份嘅成本，例如計出大股東係用每股五毫子去買貨，如果你捕捉到用低過五毫子入市，會有防守性。仲要訂目標價，到咗價就要離場，好多散戶會嫌賺得少，但其實一隻細價股可以賺20至30%，已經好好o架喇。同埋我蝕咗錢唔會溝貨，只會止蝕離場，因為你買入一隻細價股輸錢，即係現實同你估計嘅嘢唔同，背後嘅有心人諗嘢高過你，好難再贏番錢o架喇。
睇陰陽燭衡量揸沽
彩兒：炒細價股要睇通告研究財技，睇技術圖表又有冇用？
聶：技術分析我少用，原因係貨源歸邊嘅股份，成交量太少，幅圖通常都係假。但可透過睇陰陽燭分鐘圖，睇到有心人係散緊貨定係準備推高股價，分析值唔值得繼續揸。兩張日線圖同樣出現陽燭，但佢哋嗰日嘅分鐘圖走勢可以好唔同，若由開市升到收市，股價可能再會被拉升，若開市後初期已升到全日最高價，然後橫行，隻股應該係會被散貨。
期權易玩 豐儉由人
金：中國銀河國際環球市場部銷售總監 金曹（筆名）
彩兒：你做開IT，點解變咗金融人，仲寫Blog、出書？
金：我做IT嗰時係支援盤房，一個交易員用嘅工具都係我組人幫佢整。由於我係個IT主管，啲交易員做過咩交易去賺到錢，基本上我都可以掌握得到。我明白到，如果係有學識、有技術，最搵錢就係打入金融嘅心臟，而呢個就係錢搵錢嘅地方。
Kitty：你玩咗廿年期權，嚟緊出書又講期權，悶唔悶呀？
金：買股票、外匯、黃金或其他投資工具可以買上買落，但要睇升睇跌，期權有一個好處係佢除咗睇方向外，仲可以靠估波幅賺錢。若掌握得好，每月可賺少少，積少成多，識得玩期權反而唔會悶。
好多人都誤解期權係有錢人先玩嘅遊戲，其實期權係豐儉由人，最平揸住股票，利用Long Put（認沽期權長倉）做對沖，成本可能只係股票貨值嘅1至2%，一、二千蚊已經做到。
彩兒： 講起對沖，恒指由上年四月高位到依家跌咗8,000幾點（口架）喇喎，唔係仲有得跌呀嘛？
學資產配置積財富
金：我覺得個市要經歷一個價值調整，過去十幾年啲人習慣咗中國高增長，同埋人民幣長期升值，上年八月人民幣一次性貶值，促使市場重新調整組合，引起價格重估。恒指六成以上嘅股份都係同人民幣資產相關，一五年恒指市盈率係8.7倍左右，嗰時大約22,000點，但去到今年一月，據分析員嘅盈測，恒指若果維持8倍市盈率，可能要跌至16,000至17,000點水平，未必會發生，但要有充分準備呀。
Kitty：我偷睇到你本書講股災前異象，你講少少我聽吖。
金：其中一個簡單嘅信號係恒指條20天線低過50天線、而趨勢向下，港元弱對股市都係個比較差嘅信號。另外，可以由期權嘅引伸波幅去睇，當Put（認沽期權）嘅引伸波幅高，可以代表莊家唔係好願意賣Put，佢哋都覺得市場有好大嘅下行風險。
彩兒：聽完你講呢啲股災前異象，真係個心都離一離呀！
金：所以我哋要學資產配置，當出現危機時有購買力，可能係累積財富嘅機會。若預期個市會大跌，長線投資者應該調校組合，轉去買啲收息股、公用股、電訊股。另可用期權做好對沖，如果個別股票冇期權，你要計吓成個組合相對恒指嘅敏感度（又即Beta），再用指數期權對沖下跌風險。
國際食品股博得過
王：香港奧國經濟學院創辦人 王弼
彩兒：你寫緊本書開宗明義講爆煲、股災，依家環球市場真係咁大鑊？
王：過去經濟每七年就爆一次煲，依家全世界嘅問題係債務太多，政府要用非常手段先會解決到，最差嘅時候仲未到。
環球劣勢 未到谷底
Kitty：你上年五月警告A股牛市將盡，依家就預言中國「終須一爆」，你睇中國都睇得好淡喎。
王：中國有好多投資都係由國家主導，冇咩經濟效益，導致銀行有好多壞帳，同埋出現產能過剩問題。另外，近年人行印咗好多人民幣，如果人人都想兌番美金，外匯儲備根本唔夠，但如果實施外匯管制，經濟問題就會更差。
彩兒：人民幣匯價近月都好似穩定番啦，唔係已經雨過天青咩？
王：人民幣貶值係好痛苦嘅過程，中央一定唔會咁做，反而會收緊唔畀咁多資金流出，但托高人民幣匯價嘅代價好大，會削弱出口競爭力。
彩兒：全唔投資嘅話，啲錢又會畀通脹蠶食，但喺咁嘅亂局之下，買咩先好呀？
揸現金 避開中資股
王：投資者要避開同內地有關嘅公司，港股市場上選擇其實唔係好多。我依家會增持現金，大約佔成個資產組合四成，另有三成股票，多為藍籌、高息股，其中有啲用期權方式操作，賺番啲現金流。好似恒基地產（00012）咁，我喺佢40蚊就Sell Put（沽出認沽期權）去賺期權金，因為覺得佢股價相對每股資產淨值有好大折讓，加上有重組概念，應該唔會大跌。
Kitty：港股市場冇咩好買，放眼環球又係咪上策？
王：美股估值係高，但係值得嘅。有時都唔知啲增長股係咪真係有高增長，不如買啲年年都有穩定增長同增加派息嘅國際品牌，尤其係一啲食品股，因為食品公司始終難被科技取代。
若有料報畀彩兒同Kitty或有嘢問，可電郵money.biz@on.cc
彩兒 Kitty