Market Insight：體品股宜選擇吸納

古勝執筆時傳來歐央行議息結果，一如預期再度減息0.1厘，存款負利率擴大至0.4厘，並將每月資產購買計劃額度由600億歐元擴大至800億歐元。

昨日朝早內地公布二月通脹數據，受天氣寒冷及春節因素，居民消費價格指數（CPI）按年升2.3%，比市場預期1.9%高，亦比一月升幅進一步擴大0.5個百分點，主要受食品價格上升帶動，物價經連升四個月，並創下19個月新高。

國家隊漸力不從心

毫無疑問係，今日的中國經濟確實十個茶壺七個蓋，醫得頭嚟腳又痛。一四年底開始行寬鬆策略，放水救市配合經濟轉型，去產能、去庫存，結果，過去一年深圳樓價狂升近五成，逐漸見到泡沫，但三四線天量待售「吉屋」，要頂住個雞棚惟有任由一線城市樓價愈炒愈癲。

內地處負利率時代，近月物價也見拗腰回升，最後會唔會發展到滯脹的困局？現在下判斷無疑言之尚早，但可肯定通脹回升下，人行多多少少存有顧忌，好難肆無忌憚減息救經濟。兩會期間，國家隊出錢出力為股市營造良好氣氛，漸見力不從心，加埋通脹數據，昨日A股級級落，滬綜指跌57點或2%，隊到貼近全日低位收報2,804點，一口氣跌穿多條平均線，睇落形勢並不是十分樂觀。

恒指已連跌四日，而且一連兩日成交縮到得五百幾億，市場欠缺新消息刺激大市破頂，恒指收報19,984點跌11點。股市炒家快上快落，周三因為低油價下業績勁升的國泰（00293）昨打回原形，跌3.9%收13.48元。

早兩日仲繪形繪聲有神秘投資者在街外密密收集英國品牌Burberry，仲揸到過5%，惹來收購疑雲，結果連家族持有，股權比「格仔牌」集中得多的普拉達（01913），都有理無理被炒到上四個月高位見31.25元。

好明顯有一陣陣「伏」味傳出，昨日外媒引述消息話滙控託管股份，來自多名非單一投資者持股，前晚Burberry在歐洲市飛插完，昨日輪到普拉達狂插10.3%，收報26元，連周二收市價26.65元亦不保。

全球經濟進入低增長年代，俄羅斯、中東甚至來自中國的大豪客，消費豪情不再，對全球奢侈品牌營收的衝擊無疑是立竿見影。Burberry股價同A股一樣，自去年上半年見頂，從1,929便士的歷史高位高台跳水，殺到落今年初1,047便士的低位，但奢侈品公司係咪抵買？睇落又唔係，因為股價未必及得上盈利下跌幅度。

361度退熱可吼實

睇番歐洲奢侈品牌股份的平均市盈率，過去幾個月都平均維持19至25倍左右，同○八年海嘯期間，正式的「海嘯價」8倍幾相比仍有段距離。「格仔牌」一六年PE約19.5倍，都係過去六年間15至25倍範圍的中游水平，未考慮街外收集，勞師動眾下涉及額外收購溢價，因為傳聞亂咁衝好易出事。

體育用品股匹克體育（01968）昨日出成績表，賺3.92億元人仔，升22%，業績創咗一一年以來新高。體品股經歷近三年的去庫存及店網策略調整後，幾乎肯定是少數在內地零售業吹淡風之下，能夠交到唔錯增長的行業。今次匹克份成績表較市場估計超額完成，亦都印證這個想法。

睇番舊年十一、十二月，市場高唱中國經濟硬着陸支歌仔，基金唔理三七廿一，連體育用品股都質到七個一皮。經過昨日一彈，匹克高位跌幅同龍頭安踏（02020）的23.4%差唔多，但再數落去，業績料對辦但股價落得唔少的361度（01361）及特步國際（01368），如呢兩日股價退一退熱可以吼實。

公用股不缺捧場客

下周聯儲局議息，自從上周公布熱爆的二月就業數據，債商取態已由早前斷言今年無得加，改晒口風話三月唔加住。到底年終美息返唔返到上1厘，肯定有排拗。但值得留意，一月底開始，港燈（02638）及中電（00002）一路見有資金買住，股價浸浸上，中電仲創埋歷史新高（經股息除淨價計）。

傳統上，真係純粹追求防守力，先會吼兩隻公共事業股，操盤手若非睇死美國（即係香港）十年八載都加唔到息，都肯定相當睇淡中港經濟，皆因其他揩到少少地產業務的高息股，好似領展（00823）同港鐵（00066）一類，近排股價郁都唔郁吓。

古勝